husn KHud jalwa-numai pe hai majbur miyan

husn ḳhud jalva-numā.ī pe hai majbūr miyāñ

jāniye ishq ko ek mujrim-e-ma.azūr miyāñ

qurb gar aur na baḌh jaa.e to merā zimma

khīñch kar dekhiye apne ko zarā duur miyāñ

mil rahī hai hameñ qismat se vo sahbā ki jise

pī ke hotā nahīñ koī bhī maḳhmūr miyāñ

apnī rātoñ ko jo bedār rakhā karte haiñ

un kī bedārī ko darkār hai ik suur miyāñ

ishq vo naar ki dekhe se dikhā.ī na paḌe

husn vo nuur ki rahtā nahīñ mastūr miyāñ

ehtirām-e-gul-o-lāla ba-sar-o-chashm magar

bacheñ kāñToñ se ye apnā nahīñ dastūr miyāñ

tum jab aate ho to kuchh aisā lagā kartā hai

jaise jannat se utar aa.ī ho ik huur miyāñ

ham ne sau baar basāyā use ummīdoñ se

dil vo bastī hai jo rahtī nahīñ māmūr miyāñ

daar par chaḌhne kī tāqat nahīñ 'arshī' meñ abhī

sar se pā tak hai shikastoñ se badan chuur miyāñ

husn KHud jalwa-numai pe hai majbur miyan

jaaniye ishq ko ek mujrim-e-mazur miyan

qurb gar aur na baDh jae to mera zimma

khinch kar dekhiye apne ko zara dur miyan

mil rahi hai hamein qismat se wo sahba ki jise

pi ke hota nahin koi bhi maKHmur miyan

apni raaton ko jo bedar rakha karte hain

un ki bedari ko darkar hai ek sur miyan

ishq wo nar ki dekhe se dikhai na paDe

husn wo nur ki rahta nahin mastur miyan

ehtiram-e-gul-o-lala ba-sar-o-chashm magar

bachen kanTon se ye apna nahin dastur miyan

tum jab aate ho to kuchh aisa laga karta hai

jaise jannat se utar aai ho ek hur miyan

hum ne sau bar basaya use ummidon se

dil wo basti hai jo rahti nahin mamur miyan

dar par chaDhne ki taqat nahin 'arshi' mein abhi

sar se pa tak hai shikaston se badan chur miyan