husn KHud mein na hua jalwa-numa mere baad

husn ḳhud meñ na huā jalva-numā mere baad

raas kyā aatī zamāne kī havā mere baad

myaan se niklī na shamshīr-e-jafā mere baad

raqs-e-bismil kā tamāsha na huā mere baad

pās-e-dastūr na saaqī ko rahā mere baad

dar-e-mai-ḳhāna khulā chhoḌ diyā mere baad

ik mire uThne se dil baiTh gayā rindoñ kā

jaam uThe aur na shīsha hī jhukā mere baad

har qadam dūrī-e-manzil kī taraf le ke gayā

rāsta bhuul ga.e rāh-numā mere baad

bār-e-ehsān se dab jaa.e na turbat 'āzād'

chādar-e-gul se na marqad ko sajā mere baad

husn KHud mein na hua jalwa-numa mere baad

ras kya aati zamane ki hawa mere baad

myan se nikli na shamshir-e-jafa mere baad

raqs-e-bismil ka tamasha na hua mere baad

pas-e-dastur na saqi ko raha mere baad

dar-e-mai-KHana khula chhoD diya mere baad

ek mere uThne se dil baiTh gaya rindon ka

jam uThe aur na shisha hi jhuka mere baad

har qadam duri-e-manzil ki taraf le ke gaya

rasta bhul gae rah-numa mere baad

bar-e-ehsan se dab jae na turbat 'azad'

chadar-e-gul se na marqad ko saja mere baad