husn ki shama ke parwane chale aate hain

husn kī sham.a ke parvāne chale aate haiñ

be-bulā.e hue dīvāne chale aate haiñ

kyā mire dil ko vo samjhāne chale aate haiñ

ya.anī aur aag ko sulgāne chale aate haiñ

fasl-e-bāda bhī nahīñ mast ghaTā.eñ bhī nahīñ

kyoñ chhalakte hue paimāne chale aate haiñ

dard-e-dil dete haiñ aur ḳhud ye karam karte haiñ

rone vāloñ ko vo samjhāne chale aate haiñ

rahm se ḳhālī nahīñ mere liye un kā sitam

is dil-e-zār ko taḌpāne chale aate haiñ

tum na aa.e sitam afsos ayādat ke liye

apne to apne haiñ begāne chale aate haiñ

koī poshīda nahīñ rāz-e-mohabbat lekin

'rāz' hamrāz ko samjhāne chale aate haiñ

husn ki shama ke parwane chale aate hain

be-bulae hue diwane chale aate hain

kya mere dil ko wo samjhane chale aate hain

yani aur aag ko sulgane chale aate hain

fasl-e-baada bhi nahin mast ghaTaen bhi nahin

kyon chhalakte hue paimane chale aate hain

dard-e-dil dete hain aur KHud ye karam karte hain

rone walon ko wo samjhane chale aate hain

rahm se KHali nahin mere liye un ka sitam

is dil-e-zar ko taDpane chale aate hain

tum na aae sitam afsos ayaadat ke liye

apne to apne hain begane chale aate hain

koi poshida nahin raaz-e-mohabbat lekin

'raaz' hamraaz ko samjhane chale aate hain