husn ki waqat nahin ab ishq ki sarkar mein

husn kī vaq.at nahīñ ab ishq kī sarkār meñ

bik ga.e yūsuf hazāroñ misr ke bāzār meñ

jo na karnā thā vo rāz-e-ishq zāhir kar diyā

aa ke rusvā ho ga.e ham majma-e-aġhyār meñ

aur se kyā pūchhte haiñ aa ke ham se pūchhiye

kyā maza miltā hai dil ko aap kī guftār meñ

ḳhvāb se bedār hote hī nahīñ haiñ bāda-ḳhvār

aisī mastī hai havā-e-sub.h kī raftār meñ

ishq-e-lailā meñ ye dekhā haal ham ne qais kā

ḳhaak chhānā hī kiyā vo kūcha-o-bāzār meñ

ai masīhā kis tarah hāzir ho tere sāmne

ab sakat uThne kī bhī baaqī nahīñ bīmār meñ

āfat-e-arz-e-samāvī se bachegā apnā ghar

ism-e-āzam jab hai shāmil har dar-o-dīvār meñ

dushmanoñ kā dost ban jaatā hai kuchh din ke liye

aib hotā hai ye aksar mard-e-kaj-raftār meñ

kar nahīñ sakte haiñ aapas meñ vo bāteñ hosh kī

be-ḳhudī kā ye asar hai mai-kash o mai-ḳhvār meñ

be-ḳhabar vo hai to hai ye bā-ḳhabar har gaam se

farq hai ai dil bahut lā-yā'qil-o-hushiyār meñ

dasht-o-gulshan meñ nahīñ 'hāmid' koī dil-bastagī

jī bahaltā hai agar apnā to kū-e-yār meñ

husn ki waqat nahin ab ishq ki sarkar mein

bik gae yusuf hazaron misr ke bazar mein

jo na karna tha wo raaz-e-ishq zahir kar diya

aa ke ruswa ho gae hum majma-e-aghyar mein

aur se kya puchhte hain aa ke hum se puchhiye

kya maza milta hai dil ko aap ki guftar mein

KHwab se bedar hote hi nahin hain baada-KHwar

aisi masti hai hawa-e-subh ki raftar mein

ishq-e-laila mein ye dekha haal hum ne qais ka

KHak chhana hi kiya wo kucha-o-bazar mein

ai masiha kis tarah hazir ho tere samne

ab sakat uThne ki bhi baqi nahin bimar mein

aafat-e-arz-e-samawi se bachega apna ghar

ism-e-azam jab hai shamil har dar-o-diwar mein

dushmanon ka dost ban jata hai kuchh din ke liye

aib hota hai ye aksar mard-e-kaj-raftar mein

kar nahin sakte hain aapas mein wo baaten hosh ki

be-KHudi ka ye asar hai mai-kash o mai-KHwar mein

be-KHabar wo hai to hai ye ba-KHabar har gam se

farq hai ai dil bahut la-ya'qil-o-hushiyar mein

dasht-o-gulshan mein nahin 'hamid' koi dil-bastagi

ji bahalta hai agar apna to ku-e-yar mein