husn kya kya muskuraya ishq ke andaz par

husn kyā kyā muskurāyā ishq ke andāz par

naġhma-e-ġham jab bhī chheḌā ham ne dil ke saaz par

ḳhār-zār-e-zindagī ko bhī banā detā hai ḳhuld

kyoñ na ham īmān laa.eñ ishq ke e.ajāz par

terī apnī zaat meñ muzmar hai husn-e-lam-yazal

kis liye sajde pe sajda jalva-gāh-e-nāz par

jalva-farmā kaun mehr-o-māh ke parde meñ hai

raqs kartā hai nizām-e-dahr kis ke saaz par

bāl-o-par se kab koī pahuñchā farāz-e-arsh tak

ye sa.ādat munhasir hai himmat-e-parvāz par

haiñ vahī maqbūl-e-ālam jo garebāñ-chāk haiñ

har kalī gul ban ga.ī is inkishāf-e-rāz par

aa ga.ī sehn-e-chaman meñ fasl-e-gul to kyā huā

haiñ vahī ġham ke tarāne zindagī ke saaz par

rāz-e-ulfat ġhair se kahnā hai nang-e-āshiqī

naaz thā mansūr ko kyoñ inkishāf-e-rāz par

ishq kī qismat meñ hote haiñ salīb-o-dār bhī

shaad ai 'sābir' na ho tū lazzat-e-āġhāz par

husn kya kya muskuraya ishq ke andaz par

naghma-e-gham jab bhi chheDa hum ne dil ke saz par

KHar-zar-e-zindagi ko bhi bana deta hai KHuld

kyon na hum iman laen ishq ke eajaz par

teri apni zat mein muzmar hai husn-e-lam-yazal

kis liye sajde pe sajda jalwa-gah-e-naz par

jalwa-farma kaun mehr-o-mah ke parde mein hai

raqs karta hai nizam-e-dahr kis ke saz par

baal-o-par se kab koi pahuncha faraaz-e-arsh tak

ye saadat munhasir hai himmat-e-parwaz par

hain wahi maqbul-e-alam jo gareban-chaak hain

har kali gul ban gai is inkishaf-e-raaz par

aa gai sehn-e-chaman mein fasl-e-gul to kya hua

hain wahi gham ke tarane zindagi ke saz par

raaz-e-ulfat ghair se kahna hai nang-e-ashiqi

naz tha mansur ko kyon inkishaf-e-raaz par

ishq ki qismat mein hote hain salib-o-dar bhi

shad ai 'sabir' na ho tu lazzat-e-aghaz par