husn-parasti hazrat-e-naseh aap ke bas ki baat nahin

husn-parastī hazrat-e-nāseh aap ke bas kī baat nahīñ

apnā apnā zarf-e-nazar hai 'ishq-o-havas kī baat nahīñ

uf vo asiir rihā.ī jis kī bas meñ nahīñ sayyād ke bhī

qaid-e-vafā kā zikr hai hamdam dām-o-qafas kī baat nahīñ

qāfila-e-arbāb-e-junūñ meñ chhoḌ ke manzil ham kyoñ aa.e

vahshat dil kī majbūrī thī bāñg-e-jaras kī baat nahīñ

rahm na kījiye sun to lījiye itnā sitam bhī Thiik nahīñ

ahl-e-vafā kā afsāna hai mor-o-magas kī baat nahīñ

dil vāloñ kī sargardānī gulshan meñ bhauñroñ kī tarah

ḳhūn-e-jigar kā afsāna hai phuul ke ras kī baat nahīñ

madhoshī kī jo bhī sazā ho jaur-e-fuzūñ yā hijr-e-davām

aap ke aage hosh meñ rahnā apne bas kī baat nahīñ

ham pe sitam to Thiik hai yā-rab un kā dushman kyoñ hai jahāñ

lāla-o-gul kā haq hai chaman par ḳhār-o-ḳhas kī baat nahīñ

vādī-e-aiman ban saktī hai sho'la-e-nai se bazm-e-tarab

soz sarāpā ban jaatā hai soz-e-nafas kī baat nahīñ

abr-e-karam kā zikr na kījiye ātish-e-ġham hai qismat-soz

tā-dam-e-āḳhir jalnā hai do chaar baras kī baat nahīñ

husn-parasti hazrat-e-naseh aap ke bas ki baat nahin

apna apna zarf-e-nazar hai 'ishq-o-hawas ki baat nahin

uf wo asir rihai jis ki bas mein nahin sayyaad ke bhi

qaid-e-wafa ka zikr hai hamdam dam-o-qafas ki baat nahin

qafila-e-arbab-e-junun mein chhoD ke manzil hum kyon aae

wahshat dil ki majburi thi bang-e-jaras ki baat nahin

rahm na kijiye sun to lijiye itna sitam bhi Thik nahin

ahl-e-wafa ka afsana hai mor-o-magas ki baat nahin

dil walon ki sargardani gulshan mein bhaunron ki tarah

KHun-e-jigar ka afsana hai phul ke ras ki baat nahin

madhoshi ki jo bhi saza ho jaur-e-fuzun ya hijr-e-dawam

aap ke aage hosh mein rahna apne bas ki baat nahin

hum pe sitam to Thik hai ya-rab un ka dushman kyon hai jahan

lala-o-gul ka haq hai chaman par KHar-o-KHas ki baat nahin

wadi-e-aiman ban sakti hai sho'la-e-nai se bazm-e-tarab

soz sarapa ban jata hai soz-e-nafas ki baat nahin

abr-e-karam ka zikr na kijiye aatish-e-gham hai qismat-soz

ta-dam-e-aKHir jalna hai do chaar baras ki baat nahin