husn takmil-e-tamanna hai saba ho jaana

husn takmīl-e-tamannā hai sabā ho jaanā

shahr-dar-shahr har ik dil kī ridā ho jaanā

paas aa aa ke har ik lamha bichhaḌnā terā

jaise ḳhushbū kā rag-e-gul se judā ho jaanā

is tarah TuuT ke barse haiñ garajte bādal

jaise jaagī huī āñkhoñ kī sadā ho jaanā

zindagī tū ne ka.ī rañg bhare haiñ paiham

zulf-e-shab-rañg kabhī rañg-e-hinā ho jaanā

kitne ban-bās liye phir bhī tire saath rahe

ham ne sochā hī nahīñ tujh se judā ho jaanā

husn-e-taḳhlīq bhī hai rif.at-e-insāñ bhī hai

azmat-e-dil hai har ik dil kī davā ho jaanā

sar-bulandī hai yahāñ shahr meñ zinda rahnā

sarfarāzī hai yahāñ rāh-numā ho jaanā

bujh ga.e rāh-e-tamannā meñ hazāroñ jugnū

tum mire vāste naqsh-e-kaf-e-pā ho jaanā

ye bhī mumkin nahīñ ai dost tū sab kī ḳhātir

chāñdnī ban ke kahīñ jalva-numā ho jaanā

khetiyāñ suukh ga.iiñ ḳhushk hue dil ke nagar

bāvar aayā hameñ paanī kā havā ho jaanā

husn takmil-e-tamanna hai saba ho jaana

shahr-dar-shahr har ek dil ki rida ho jaana

pas aa aa ke har ek lamha bichhaDna tera

jaise KHushbu ka rag-e-gul se juda ho jaana

is tarah TuT ke barse hain garajte baadal

jaise jagi hui aankhon ki sada ho jaana

zindagi tu ne kai rang bhare hain paiham

zulf-e-shab-rang kabhi rang-e-hina ho jaana

kitne ban-bas liye phir bhi tere sath rahe

hum ne socha hi nahin tujh se juda ho jaana

husn-e-taKHliq bhi hai rifat-e-insan bhi hai

azmat-e-dil hai har ek dil ki dawa ho jaana

sar-bulandi hai yahan shahr mein zinda rahna

sarfaraazi hai yahan rah-numa ho jaana

bujh gae rah-e-tamanna mein hazaron jugnu

tum mere waste naqsh-e-kaf-e-pa ho jaana

ye bhi mumkin nahin ai dost tu sab ki KHatir

chandni ban ke kahin jalwa-numa ho jaana

khetiyan sukh gain KHushk hue dil ke nagar

bawar aaya hamein pani ka hawa ho jaana