husn un ka apne zauq-e-did mein pata hun main

husn un kā apne zauq-e-dīd meñ paatā huuñ maiñ

sāmne ho kar vo chhupte haiñ taḌap jaatā huuñ maiñ

ishrat-e-jalva bhī ho jaa.e jahāñ hairat-zada

ai ḳhayāl-e-dost us manzil pe ghabrātā huuñ maiñ

dekhtā huuñ apne ġham-ḳhvāroñ kī jab be-dardiyāñ

husn-e-be-parda kī rah rah kar qasam khātā huuñ maiñ

intizār us kā hai kitnā jāñ-gusil kyūñkar kahūñ

ḳhat meñ jis kā naam hī likh kar taḌap jaatā huuñ maiñ

kab sambhalne degī ġhash se un kī chashm-e-barq-pāsh

muzhda bādā-e-be-ḳhudī aate haiñ vo jaatā huuñ maiñ

be-ḳhayālī meñ kabhī apnī zabān-e-hāl se

ḳhasta-hālī ke maze un ko bhī samjhātā huuñ maiñ

aah ab tak kī nahīñ sair-e-bahāristān-e-dil

ik ḳhayālī rau meñ ai hamdam bahā jaatā huuñ maiñ

hairat-afzā hai mirā ishq-e-mohabbat-āfrīñ

ḳhud hī ab muztar nahīñ un ko bhī taḌpātā huuñ maiñ

rāsta chhoḌ ai taġhāful mere ghar aate haiñ vo

rahbarī kar ai tamannā un ke ghar jaatā huuñ maiñ

hairat-e-mashq-e-tasavvur kho na de mujh ko kahīñ

sāmne apne tujhe ai dil-nashīñ paatā huuñ maiñ

lā rahī hai un kī chashm-e-lutf ishrat ke payām

dekh ai 'manzūr' ab kaisā nazar aatā huuñ maiñ

husn un ka apne zauq-e-did mein pata hun main

samne ho kar wo chhupte hain taDap jata hun main

ishrat-e-jalwa bhi ho jae jahan hairat-zada

ai KHayal-e-dost us manzil pe ghabraata hun main

dekhta hun apne gham-KHwaron ki jab be-dardiyan

husn-e-be-parda ki rah rah kar qasam khata hun main

intizar us ka hai kitna jaan-gusil kyunkar kahun

KHat mein jis ka nam hi likh kar taDap jata hun main

kab sambhalne degi ghash se un ki chashm-e-barq-pash

muzhda baada-e-be-KHudi aate hain wo jata hun main

be-KHayali mein kabhi apni zaban-e-haal se

KHasta-haali ke maze un ko bhi samjhata hun main

aah ab tak ki nahin sair-e-bahaaristan-e-dil

ek KHayali rau mein ai hamdam baha jata hun main

hairat-afza hai mera ishq-e-mohabbat-afrin

KHud hi ab muztar nahin un ko bhi taDpata hun main

rasta chhoD ai taghaful mere ghar aate hain wo

rahbari kar ai tamanna un ke ghar jata hun main

hairat-e-mashq-e-tasawwur kho na de mujh ko kahin

samne apne tujhe ai dil-nashin pata hun main

la rahi hai un ki chashm-e-lutf ishrat ke payam

dekh ai 'manzur' ab kaisa nazar aata hun main