husn wale bazm mein inkar hi karte rahe

husn vaale bazm meñ inkār hī karte rahe

ishq vaale ishq kā iz.hār hī karte rahe

jiinā marnā apnā ham dushvār hī karte rahe

un kī har ik baat kā iqrār hī karte rahe

ham ko dekho ham unhīñ par ho ga.e dil se fidā

jo hamārī zaat ko mismār hī karte rahe

tere dil meñ kaun hai ye to kabhī pūchhā nahīñ

jān-e-jāñ ham to tirā dīdār hī karte rahe

ham sadā chunte rahe sab ḳhaar jin kī raah se

vo hamārī raah ko pur-ḳhār hī karte rahe

mere apnoñ ne kiyā hai mujh pe ye kaisā sitam

vo mujhe us paar se is paar hī karte rahe

koī bhī un ke maraz kī lā nahīñ paayā davā

vo to chārāgar ko bhī bīmār hī karte rahe

chand lamhe bhī sukūñ ke mil na paa.e un ke saath

'faiz' ko vo dard se do-chār hī karte rahe

husn wale bazm mein inkar hi karte rahe

ishq wale ishq ka izhaar hi karte rahe

jina marna apna hum dushwar hi karte rahe

un ki har ek baat ka iqrar hi karte rahe

hum ko dekho hum unhin par ho gae dil se fida

jo hamari zat ko mismar hi karte rahe

tere dil mein kaun hai ye to kabhi puchha nahin

jaan-e-jaan hum to tera didar hi karte rahe

hum sada chunte rahe sab KHar jin ki rah se

wo hamari rah ko pur-KHar hi karte rahe

mere apnon ne kiya hai mujh pe ye kaisa sitam

wo mujhe us par se is par hi karte rahe

koi bhi un ke maraz ki la nahin paya dawa

wo to chaaragar ko bhi bimar hi karte rahe

chand lamhe bhi sukun ke mil na pae un ke sath

'faiz' ko wo dard se do-chaar hi karte rahe