husn walon ki tabiat se haya nikli hai

husn vāloñ kī tabī.at se hayā niklī hai

ishq kī ḳhaak se ḳhushbu-e-vafā niklī hai

saañs niklī hai to kam-baḳht qazā niklī hai

maut kī kokh se jiine kī davā niklī hai

chāhe ārām de taklīf de us kā beTā

maañ ke dil se to hamesha hī duā niklī hai

chhoḌ kar apne har-ik kaam ko nikle bāhar

jab bhī masjid se mo.azzin kī sadā niklī hai

ḳhānqāhoñ pe barastī hai ki mai-ḳhānoñ par

baiTh kar dosh-e-havā par jo ghaTā niklī hai

jis ko samjhā thā masīhā tire bīmāroñ ne

us kī jholī se abhī naqlī davā niklī hai

ek duniyā huī āḳhir ko munavvar 'qaisar'

kamlī vaale ke madīne se ziyā niklī hai

husn walon ki tabiat se haya nikli hai

ishq ki KHak se KHushbu-e-wafa nikli hai

sans nikli hai to kam-baKHt qaza nikli hai

maut ki kokh se jine ki dawa nikli hai

chahe aaram de taklif de us ka beTa

man ke dil se to hamesha hi dua nikli hai

chhoD kar apne har-ik kaam ko nikle bahar

jab bhi masjid se moazzin ki sada nikli hai

KHanqahon pe barasti hai ki mai-KHanon par

baiTh kar dosh-e-hawa par jo ghaTa nikli hai

jis ko samjha tha masiha tere bimaron ne

us ki jholi se abhi naqli dawa nikli hai

ek duniya hui aaKHir ko munawwar 'qaisar'

kamli wale ke madine se ziya nikli hai