hun amn ka daghi kabhi shorish ka sabab hun

huuñ amn kā dāġhī kabhī shorish kā sabab huuñ

maiñ mas.ala ḳhud apne liye ġhaur-talab huuñ

altāf bahut haiñ mire āzār bhī behad

kahne ko to kahiye ki faqat jumbish-e-lab huuñ

jab chāhūñgā tab chhīn ke le lūñgā mirā haq

phailā.e hue dast-e-talab tab thā na ab huuñ

kirdār kī azmat huuñ qanā.at hai mirā naam

nai dast-e-gadā.ī huuñ na dāmān-e-talab huuñ

insān huuñ hairat se takeñ jinn-o-malā.ik

maiñ mehr-o-mohabbat huuñ kabhī qahr-o-ġhazab huuñ

ik shaġhl hai merā jise kahte haiñ tafakkur

masrūf-e-mashaqqat huuñ na ārām-talab huuñ

fitrat mujhe dohrā.e azal se to abad tak

āġhāz-e-sahar hone ko huuñ āḳhir-e-shab huuñ

hote haiñ mazāmīn-o-ḳhayālāt mire paas

tanhā na mujhe jāniye maiñ bazm-e-adab huuñ

hālāt se shikva na muqaddar se gila hai

ai 'rāz' maiñ ḳhud apnī tabāhī kā sabab huuñ

hun amn ka daghi kabhi shorish ka sabab hun

main masala KHud apne liye ghaur-talab hun

altaf bahut hain mere aazar bhi behad

kahne ko to kahiye ki faqat jumbish-e-lab hun

jab chahunga tab chhin ke le lunga mera haq

phailae hue dast-e-talab tab tha na ab hun

kirdar ki azmat hun qanaat hai mera nam

nai dast-e-gadai hun na daman-e-talab hun

insan hun hairat se taken jinn-o-malaik

main mehr-o-mohabbat hun kabhi qahr-o-ghazab hun

ek shaghl hai mera jise kahte hain tafakkur

masruf-e-mashaqqat hun na aaram-talab hun

fitrat mujhe dohrae azal se to abad tak

aaghaz-e-sahar hone ko hun aaKHir-e-shab hun

hote hain mazamin-o-KHayalat mere pas

tanha na mujhe jaaniye main bazm-e-adab hun

haalat se shikwa na muqaddar se gila hai

ai 'raaz' main KHud apni tabahi ka sabab hun