hun dafn mar ke kucha-e-jaanan ke samne

huuñ dafn mar ke kūcha-e-jānāñ ke sāmne

bulbul kā āshiyāñ ho gulistāñ ke sāmne

sharmā.e ashk-e-ḳhūñ se gul-e-tar bahār meñ

rang-e-chaman uḌā mire dāmāñ ke sāmne

qumrī ko pā-ba-gil nazar aatā hai sharm se

shamshād mere sarv-e-ḳhirāmāñ ke sāmne

gar ḳhatt-e-sabz lab pe tire ḳhizr dekh paa.e

phir muñh kare na chashma-e-haivāñ ke sāmne

nazroñ meñ jauharī ke ḳhazaf-reze ban ga.e

la.al-e-jigar tire lab-o-dandāñ ke sāmne

dekhe jo us parī se mujhe garm-e-iḳhtilāt

bilqīs muñh kare na sulaimāñ ke sāmne

muusā nahīñ jo aañkh jhapak jā.egī mirī

aa.eñ huzūr dīda-e-hairāñ ke sāmne

rote haiñ ham idhar vo udhar sunte haiñ khaḌe

bijlī chamak rahī hai ye bārāñ ke sāmne

sadqe vo sar ke hogā abhī kaisī hamsarī

kholo to baal sumbul-e-pechāñ ke sāmne

ghunDī pe ho qabā ke nisār aḳhtar-e-falak

sajde kare hilāl garebāñ ke sāmne

aage mire raqīb ko dete ho gāliyāñ

fiqre ye kījiye kisī nādāñ ke sāmne

ai gul chaman meñ baat kī bulbul ko kyā majāl

ġhunche na kholeñ muñh lab-e-ḳhandāñ ke sāmne

muusā kī tarah tum ko bhī aa.e na ġhash kahīñ

'vahbī' na jaao āriz-e-tābāñ ke sāmne

hun dafn mar ke kucha-e-jaanan ke samne

bulbul ka aashiyan ho gulistan ke samne

sharmae ashk-e-KHun se gul-e-tar bahaar mein

rang-e-chaman uDa mere daman ke samne

qumri ko pa-ba-gil nazar aata hai sharm se

shamshad mere sarw-e-KHiraman ke samne

gar KHatt-e-sabz lab pe tere KHizr dekh pae

phir munh kare na chashma-e-haiwan ke samne

nazron mein jauhari ke KHazaf-reze ban gae

lal-e-jigar tere lab-o-dandan ke samne

dekhe jo us pari se mujhe garm-e-iKHtilat

bilqis munh kare na sulaiman ke samne

musa nahin jo aankh jhapak jaegi meri

aaen huzur dida-e-hairan ke samne

rote hain hum idhar wo udhar sunte hain khaDe

bijli chamak rahi hai ye baran ke samne

sadqe wo sar ke hoga abhi kaisi hamsari

kholo to baal sumbul-e-pechan ke samne

ghunDi pe ho qaba ke nisar aKHtar-e-falak

sajde kare hilal gareban ke samne

aage mere raqib ko dete ho galiyan

fiqre ye kijiye kisi nadan ke samne

ai gul chaman mein baat ki bulbul ko kya majal

ghunche na kholen munh lab-e-KHandan ke samne

musa ki tarah tum ko bhi aae na ghash kahin

'wahbi' na jao aariz-e-taban ke samne