hun gham-ashna aashna-e-mohabbat

huuñ ġham-āshnā āshnā-e-mohabbat

do-ālam meñ yuuñ jagmagā.e mohabbat

azal se huī ibtidā-e-mohabbat

abad tak rahegī baqā-e-mohabbat

mohabbat ke naġhme haiñ un ke laboñ par

bahut hī hasīñ hai fazā-e-mohabbat

dil-e-muztarib par girā.ī thī bijlī

qayāmat thī vo ik adā-e-mohabbat

azal se abad tak chalā jā rahā hai

julūs-e-shahīdāñ ḳhudā-e-mohabbat

na furqat kā yaarā na qurbat gavārā

na jaane hai kyā mudda.ā-e-mohabbat

merā dīn-o-īmāñ mohabbat mohabbat

banā.e mohabbat miTā.e mohabbat

tamāshā bane haiñ vahī 'dard' aksar

bane haiñ jo ḳhud rahnumā-e-mohabbat

hun gham-ashna aashna-e-mohabbat

do-alam mein yun jagmagae mohabbat

azal se hui ibtida-e-mohabbat

abad tak rahegi baqa-e-mohabbat

mohabbat ke naghme hain un ke labon par

bahut hi hasin hai faza-e-mohabbat

dil-e-muztarib par girai thi bijli

qayamat thi wo ek ada-e-mohabbat

azal se abad tak chala ja raha hai

julus-e-shahidan KHuda-e-mohabbat

na furqat ka yara na qurbat gawara

na jaane hai kya muddaa-e-mohabbat

mera din-o-iman mohabbat mohabbat

banae mohabbat miTae mohabbat

tamasha bane hain wahi 'dard' aksar

bane hain jo KHud rahnuma-e-mohabbat