hun main bhi wahi mera muqabil bhi wahi hai

huuñ maiñ bhī vahī merā muqābil bhī vahī hai

patthar bhī vahī ā.īna-e-dil bhī vahī hai

majbūr huuñ maiñ āb-o-havā hai mirī muḳhtār

jo lāla-o-gul kī hai mirī gul bhī vahī hai

jaise vo kisī ā.ina-ḳhāna meñ makīñ ho

paikar bhī vahī aks vahī zil bhī vahī hai

ye ḳhvāb kā aalam hai ki lamhāt haiñ sākit

maiñ ab bhī vahīñ baiThā huuñ mahfil bhī vahī hai

kis fikr meñ ho ghar kī taraf lauT bhī jaao

jo nuqta-e-āġhāz hai manzil bhī vahī hai

jis ne mujhe parvāz ye āmāda kiyā thā

kyā kiije ki ab raah meñ haa.il bhī vahī hai

'shāhid' haiñ abhī kohar ke bādal jo kabhī the

aur barf kī siine pe abhī sil bhī vahī hai

hun main bhi wahi mera muqabil bhi wahi hai

patthar bhi wahi aaina-e-dil bhi wahi hai

majbur hun main aab-o-hawa hai meri muKHtar

jo lala-o-gul ki hai meri gul bhi wahi hai

jaise wo kisi aaina-KHana mein makin ho

paikar bhi wahi aks wahi zil bhi wahi hai

ye KHwab ka aalam hai ki lamhat hain sakit

main ab bhi wahin baiTha hun mahfil bhi wahi hai

kis fikr mein ho ghar ki taraf lauT bhi jao

jo nuqta-e-aghaz hai manzil bhi wahi hai

jis ne mujhe parwaz ye aamada kiya tha

kya kije ki ab rah mein hail bhi wahi hai

'shahid' hain abhi kohar ke baadal jo kabhi the

aur barf ki sine pe abhi sil bhi wahi hai