huzur khel hai ya phir Darama-bazi hai

huzūr khel hai yā phir Darāma-bāzī hai

tumhārā pyaar bil-āḳhir Darāma-bāzī hai

maiñ ulTe paañv palaT jā.ūñ terī bazm se kyā

agarche merī hī ḳhātir Darāma-bāzī hai

vo jis ko lafz baratnā talak nahīñ aatā

banā huā hai vo shā'ir Darāma-bāzī hai

ye kis liye tire kirdār sar-phire hue haiñ

ye kis Darāme kī ḳhātir Darāma-bāzī hai

agarche 'ilm hai lekin 'amal nahīñ koī

Darāme-bāz hai zākir Darāma-bāzī hai

sabhoñ ko ḳhuub hidāyat milī pas-e-parda

sab apne fan meñ haiñ māhir Darāma-bāzī hai

'adū se kah do tamāsha na ab kare koī

hamāre yaar haiñ zāhir Darāma-bāzī hai

sabhī to thop chuke ham pe apnī tahzībeñ

ham ab talak haiñ muhājir Darāma-bāzī hai

safed mom ke jaisā hai terā dil 'ārif'

dikhā.ī detā hai shātir Darāma-bāzī hai

huzur khel hai ya phir Darama-bazi hai

tumhaara pyar bil-aKHir Darama-bazi hai

main ulTe panw palaT jaun teri bazm se kya

agarche meri hi KHatir Darama-bazi hai

wo jis ko lafz baratna talak nahin aata

bana hua hai wo sha'ir Darama-bazi hai

ye kis liye tere kirdar sar-phire hue hain

ye kis Darame ki KHatir Darama-bazi hai

agarche 'ilm hai lekin 'amal nahin koi

Darame-baz hai zakir Darama-bazi hai

sabhon ko KHub hidayat mili pas-e-parda

sab apne fan mein hain mahir Darama-bazi hai

'adu se kah do tamasha na ab kare koi

hamare yar hain zahir Darama-bazi hai

sabhi to thop chuke hum pe apni tahziben

hum ab talak hain muhajir Darama-bazi hai

safed mom ke jaisa hai tera dil 'arif'

dikhai deta hai shatir Darama-bazi hai