huzur mil ke aap se main aaj muskura diya

huzūr mil ke aap se maiñ aaj muskurā diyā

tabassum aap kā jo ik udhār thā chukā diyā

bajā ki sar-kashī ġhalat qubūl inkisār bhī

magar ye kyā ki har kisī ke aage sar jhukā diyā

maiñ saḳhtiyoñ meñ jī gayā maiñ talḳhiyoñ ko pī gayā

magar kisī ne pyaar se sadā jo dī rulā diyā

na Dar mire ḳhamīr meñ na shar mire zamīr meñ

tamām zālimoñ ke naam maiñ ne ḳhat khulā diyā

jo ham-zabāñ na mil sakā to phir ġhazal 'naqīb' kyā

ki jaise andhe aadmī ke haath ā.īna diyā

huzur mil ke aap se main aaj muskura diya

tabassum aap ka jo ek udhaar tha chuka diya

baja ki sar-kashi ghalat qubul inkisar bhi

magar ye kya ki har kisi ke aage sar jhuka diya

main saKHtiyon mein ji gaya main talKHiyon ko pi gaya

magar kisi ne pyar se sada jo di rula diya

na Dar mere KHamir mein na shar mere zamir mein

tamam zalimon ke nam main ne KHat khula diya

jo ham-zaban na mil saka to phir ghazal 'naqib' kya

ki jaise andhe aadmi ke hath aaina diya