idhar bhi aaen kabhi dhup ke satae hue

idhar bhī aa.eñ kabhī dhuup ke satā.e hue

shajar khaḌe haiñ sar-e-rāh sar jhukā.e hue

kuchh aur baat karo gardish-e-jahāñ ke sivā

na vāqi.āt sunāo sune-sunā.e hue

zamīñ pe Dher kiye dopahar ke sūraj ne

tamām phuul shab-e-māh ke khilā.e hue

dhuāñ dhuāñ haiñ vo chehre bhī ab na jaane kyuuñ

mire liye the kabhī jin pe rañg aa.e hue

kuchh aur ho ki na ho zād-e-rāh manzil-e-shab

sahar ke ḳhvāb to āñkhoñ meñ haiñ sajā.e hue

khulī fazā se koī vāsta na thā jab tak

ham apne-āp meñ ḳhud ko rahe chhupā.e hue

havā kī zad pe jab aa.e to bujh ga.e 'ḳhāvar'

vo sab charāġh jo mere na the jalā.e hue

idhar bhi aaen kabhi dhup ke satae hue

shajar khaDe hain sar-e-rah sar jhukae hue

kuchh aur baat karo gardish-e-jahan ke siwa

na waqiat sunao sune-sunae hue

zamin pe Dher kiye dopahar ke suraj ne

tamam phul shab-e-mah ke khilae hue

dhuan dhuan hain wo chehre bhi ab na jaane kyun

mere liye the kabhi jin pe rang aae hue

kuchh aur ho ki na ho zad-e-rah manzil-e-shab

sahar ke KHwab to aankhon mein hain sajae hue

khuli faza se koi wasta na tha jab tak

hum apne-ap mein KHud ko rahe chhupae hue

hawa ki zad pe jab aae to bujh gae 'KHawar'

wo sab charagh jo mere na the jalae hue