idhar kuchh aur kahti hai udhar kuchh aur kahti hai

idhar kuchh aur kahtī hai udhar kuchh aur kahtī hai

ye duniyā chāhtī kuchh hai magar kuchh aur kahtī hai

ye dil kuchh aur kahtā hai nazar kuchh aur kahtī hai

magar un kī nigāh-e-mo.atabar kuchh aur kahtī hai

qasīde paḌh rahe ho tum chaman kī shaan meñ lekin

har ik jhulsī huī shāḳh-e-shajar kuchh aur kahtī hai

ba-zāhir haiñ jadīd uslūb kī ārā.isheñ dilkash

magar tahqīq-e-arbāb-e-hunar kuchh aur kahtī hai

pata sehat kā chaltā hai marīz-e-ġham ke chehre se

magar sanjīdgī-e-chārāgar kuchh aur kahtī hai

tirī poshāk ke paivand haiñ iflās ke maz.har

tirī bā-raub shaḳhsiyyat magar kuchh aur kahtī hai

banāne ko banā leñ ham bhī shīshoñ ke makāñ 'anvar'

magar yāroñ kī sang-afgan nazar kuchh aur kahtī hai

idhar kuchh aur kahti hai udhar kuchh aur kahti hai

ye duniya chahti kuchh hai magar kuchh aur kahti hai

ye dil kuchh aur kahta hai nazar kuchh aur kahti hai

magar un ki nigah-e-moatabar kuchh aur kahti hai

qaside paDh rahe ho tum chaman ki shan mein lekin

har ek jhulsi hui shaKH-e-shajar kuchh aur kahti hai

ba-zahir hain jadid uslub ki aaraishen dilkash

magar tahqiq-e-arbab-e-hunar kuchh aur kahti hai

pata sehat ka chalta hai mariz-e-gham ke chehre se

magar sanjidgi-e-chaaragar kuchh aur kahti hai

teri poshak ke paiwand hain iflas ke mazhar

teri ba-raub shaKHsiyyat magar kuchh aur kahti hai

banane ko bana len hum bhi shishon ke makan 'anwar'

magar yaron ki sang-afgan nazar kuchh aur kahti hai