idhar kuchh din se dil ki bekali kam ho gai hai

idhar kuchh din se dil kī bekalī kam ho ga.ī hai

tirī ḳhvāhish abhī hai to sahī kam ho ga.ī hai

nazar dhuñdlā rahī hai yā manāzir bujh rahe haiñ

añdherā baḌh gayā yā raushnī kam ho ga.ī hai

tirā honā to hai bas ek sūrat kā izāfa

tire hone se kyā terī kamī kam ho ga.ī hai

ḳhamoshī ko junūñ se dast-bardārī na samjho

tajassus baḌh gayā hai sar-kashī kam ho ga.ī hai

tirā rabt apne gird-o-pesh se itnā ziyāda

to kyā ḳhvāboñ se ab vābastagī kam ho ga.ī hai

sar-e-tāq-e-tamannā bujh ga.ī hai sham'-e-ummīd

udāsī baḌh ga.ī hai be-dilī kam ho ga.ī hai

sabhī zinda haiñ aur sab kī tarah maiñ bhī huuñ zinda

magar jaise kahīñ se zindagī kam ho ga.ī hai

idhar kuchh din se dil ki bekali kam ho gai hai

teri KHwahish abhi hai to sahi kam ho gai hai

nazar dhundla rahi hai ya manazir bujh rahe hain

andhera baDh gaya ya raushni kam ho gai hai

tera hona to hai bas ek surat ka izafa

tere hone se kya teri kami kam ho gai hai

KHamoshi ko junun se dast-bardari na samjho

tajassus baDh gaya hai sar-kashi kam ho gai hai

tera rabt apne gird-o-pesh se itna ziyaada

to kya KHwabon se ab wabastagi kam ho gai hai

sar-e-taq-e-tamanna bujh gai hai sham'-e-ummid

udasi baDh gai hai be-dili kam ho gai hai

sabhi zinda hain aur sab ki tarah main bhi hun zinda

magar jaise kahin se zindagi kam ho gai hai