idhar mausam ki ye KHush-e-ehtimami

idhar mausam kī ye ḳhush-e-ehtimāmī

udhar rindoñ kī ye hasrat-bajāmī

havā.eñ chal rahī haiñ sansanātī

ghaTā.eñ uTh rahīñ haiñ dhūm-dhāmī

ye hai aks-e-hilāl ai mauj-e-sāhil

ki shamshīr-e-badan kī be-niyāmī

phaḌaktā jā misāl-e-bāl-e-jibrīl

na chup ho ai dil ai mere payāmī

khule haiñ pāñch dar ik samt-e-dariyā

navishte meñ yahīñ thī ek ḳhāmī

bahut hai arsh par dam bhar kā pherā

nahīñ bhātī hameñ qaid-e-maqāmī

nahīñ hai chashm-e-fitrat meñ koī phuul

zamīñ kī kokh kā jaayā harāmī

sunā do un ko ye bhī qaul-e-'haqqī'

abhī tak soch meñ jin kī hai ḳhāmī

idhar mausam ki ye KHush-e-ehtimami

udhar rindon ki ye hasrat-bajami

hawaen chal rahi hain sansanati

ghaTaen uTh rahin hain dhum-dhami

ye hai aks-e-hilal ai mauj-e-sahil

ki shamshir-e-badan ki be-niyami

phaDakta ja misal-e-baal-e-jibril

na chup ho ai dil ai mere payami

khule hain panch dar ek samt-e-dariya

nawishte mein yahin thi ek KHami

bahut hai arsh par dam bhar ka phera

nahin bhati hamein qaid-e-maqami

nahin hai chashm-e-fitrat mein koi phul

zamin ki kokh ka jaya harami

suna do un ko ye bhi qaul-e-'haqqi'

abhi tak soch mein jin ki hai KHami