idhar na dekh zulf ko sanwarte sanwarte

idhar na dekh zulf ko sañvārte sañvārte

maiñ ban na jā.ūñ aa.ina nihārte nihārte

sitāre to zamīñ pe ham utaar laa.e aaj shab

lagegī 'umr ab unheñ shumārte shumārte

sabhī ġhamoñ ko pī gayā sab āfatoñ ko jī gayā

ki zindagī thakī mujhe guzārte guzārte

maiñ un sā ho sakā nahīñ hazār koshishoñ pe bhī

vo mujh se ho ga.e mujhe nakārte nakārte

mujhe sunā.ī dī nahīñ tirī sadā mu'āf kar

maiñ bad-havās thā tujhe pukārte pukārte

maiñ chāhtā thā us kā 'aks lafz meñ ubhār luuñ

na.ī zabān ban ga.ī ubhārte ubhārte

na.ī ḳhatā.eñ ho ga.iiñ na.e qusūr ho ga.e

purānī bhūl-chūk ko sudhārte sudhārte

kisī kā 'zarra' naqsh naqsh naql kar rahā thā maiñ

mirā hī chehra ban gayā utārte utārte

idhar na dekh zulf ko sanwarte sanwarte

main ban na jaun aaina nihaarte nihaarte

sitare to zamin pe hum utar lae aaj shab

lagegi 'umr ab unhen shumarte shumarte

sabhi ghamon ko pi gaya sab aafaton ko ji gaya

ki zindagi thaki mujhe guzarte guzarte

main un sa ho saka nahin hazar koshishon pe bhi

wo mujh se ho gae mujhe nakarte nakarte

mujhe sunai di nahin teri sada mu'af kar

main bad-hawas tha tujhe pukarte pukarte

main chahta tha us ka 'aks lafz mein ubhaar lun

nai zaban ban gai ubhaarte ubhaarte

nai KHataen ho gain nae qusur ho gae

purani bhul-chuk ko sudhaarte sudhaarte

kisi ka 'zarra' naqsh naqsh naql kar raha tha main

mera hi chehra ban gaya utarte utarte