izaen uThae hue dukh pae hue hain

īzā.eñ uThā.e hue dukh paa.e hue haiñ

ham dil se ba-tañg aa.e haiñ uktā.e hue haiñ

betāb haiñ bechain haiñ ghabrā.e hue haiñ

ham dil se ba-tañg aa.e haiñ uktā.e hue haiñ

un hoñThoñ ke bose kā mazā paa.e hue haiñ

pyaar aayā hai muñh takte haiñ lalchā.e hue haiñ

zulfeñ vo balā jī ko jo uljhā.e hue haiñ

juuḌe ke ulaT beach meñ dil aa.e hue haiñ

ġhusse meñ bhare baiThe haiñ jhallā.e hue haiñ

afroḳhta haiñ ġhairoñ ke bhaḌkā.e hue haiñ

darvāze pe baiThe haiñ nikalvā.e hue haiñ

ham ne to Dhahī dī vo ġhazab Dhaa.e hue haiñ

iThlā.e hue baiThe haiñ itrā.e hue haiñ

ab ruup hai joban pe haiñ gadrā.e hue haiñ

kyā baat hai kyā baat hai terī lab-e-jāñ-baḳhsh

aisī bhī tire ahd meñ dam khaa.e hue haiñ

mujh par unheñ rahm aa.e ye mumkin hī nahīñ hai

aise vo samajhte nahīñ samjhā.e hue haiñ

kartā ġhazab ab tak to hamārā dil-e-betāb

roke hue DāñTe hue dhamkā.e hue haiñ

hañgāma rahegā yuuñ hī kūche meñ tumhāre

āshiq kahāñ jā sakte haiñ dil aa.e hue haiñ

aa.eñ to ināyat hai nahīñ aate na aa.eñ

ham dil ko tasavvur hī se bahlā.e hue haiñ

dil Thahar gayā zaḳhm-e-jigar bhar ga.e apne

ārām hī ham tum ko jo lipTā.e hue haiñ

marne pe bhī afsurda-dilī apnī ayaañ hai

turbat pe mirī phuul bhī murjhā.e hue haiñ

aġhyār-e-siyah-rū se bahut rabt hai un ko

vo chāñd haiñ ai 'mehr' to gahnā.e hue haiñ

izaen uThae hue dukh pae hue hain

hum dil se ba-tang aae hain uktae hue hain

betab hain bechain hain ghabrae hue hain

hum dil se ba-tang aae hain uktae hue hain

un honThon ke bose ka maza pae hue hain

pyar aaya hai munh takte hain lalchae hue hain

zulfen wo bala ji ko jo uljhae hue hain

juDe ke ulaT beach mein dil aae hue hain

ghusse mein bhare baiThe hain jhallae hue hain

afroKHta hain ghairon ke bhaDkae hue hain

darwaze pe baiThe hain nikalwae hue hain

hum ne to Dhahi di wo ghazab Dhae hue hain

iThlae hue baiThe hain itrae hue hain

ab rup hai joban pe hain gadrae hue hain

kya baat hai kya baat hai teri lab-e-jaan-baKHsh

aisi bhi tere ahd mein dam khae hue hain

mujh par unhen rahm aae ye mumkin hi nahin hai

aise wo samajhte nahin samjhae hue hain

karta ghazab ab tak to hamara dil-e-betab

roke hue DanTe hue dhamkae hue hain

hangama rahega yun hi kuche mein tumhaare

aashiq kahan ja sakte hain dil aae hue hain

aaen to inayat hai nahin aate na aaen

hum dil ko tasawwur hi se bahlae hue hain

dil Thahar gaya zaKHm-e-jigar bhar gae apne

aaram hi hum tum ko jo lipTae hue hain

marne pe bhi afsurda-dili apni ayan hai

turbat pe meri phul bhi murjhae hue hain

aghyar-e-siyah-ru se bahut rabt hai un ko

wo chand hain ai 'mehr' to gahnae hue hain