ek abr sa KHayal ka chhaya ki kya hua

ik abr sā ḳhayāl kā chhāyā ki kyā huā

qatra kisī kī yaad kā Tapkā ki kyā huā

yuuñ sūkhe sūkhe paat pe us ne rakhe qadam

juuñ maiñ ne apnā she'r sunāyā ki kyā huā

kyoñ aaj dast-basta junūñ de rahā hisāb

dekho ḳhirad ne hashr uThāyā ki kyā huā

thī kā.enāt-e-huzn meñ halkī sī raushnī

vo āḳhirī sitāra bhī TuuTā ki kyā huā

aañsū bhī ek aah se nikle vo muskurā.e

kyā kyā huā na us ne jo pūchhā ki kyā huā

ik ḳhvāb-e-ḳhush-ḳhirām tasavvur ke dasht meñ

'asrār' tujh ko DhūñDne niklā ki kyā huā

ek abr sa KHayal ka chhaya ki kya hua

qatra kisi ki yaad ka Tapka ki kya hua

yun sukhe sukhe pat pe us ne rakhe qadam

jun main ne apna she'r sunaya ki kya hua

kyon aaj dast-basta junun de raha hisab

dekho KHirad ne hashr uThaya ki kya hua

thi kaenat-e-huzn mein halki si raushni

wo aaKHiri sitara bhi TuTa ki kya hua

aansu bhi ek aah se nikle wo muskurae

kya kya hua na us ne jo puchha ki kya hua

ek KHwab-e-KHush-KHiram tasawwur ke dasht mein

'asrar' tujh ko DhunDne nikla ki kya hua