ek ahd ki surat hai ki paiman ki surat

ik ahd kī sūrat hai ki paimān kī sūrat

tū dil meñ basā rahtā hai īmān kī sūrat

likhtī huuñ har ik baat guzartī hai jo dil pe

ban jā.egī ik roz ye dīvān kī sūrat

TuuTā hai abhī tak na hī TūTegā kabhī bhī

rakhtī huuñ tujhe saath maiñ ik maan kī sūrat

ab ban ke yaqīñ dil meñ simaT aayā hai mere

āġhāz meñ lagtā thā jo imkān kī sūrat

aao to zarā baaġh meñ mil kar unheñ dekheñ

aa.e haiñ parinde yahāñ mehmān kī sūrat

ai chāragaro aao mere sāmne aao

dekho to zarā be-sar-o-sāmān kī sūrat

ek ahd ki surat hai ki paiman ki surat

tu dil mein basa rahta hai iman ki surat

likhti hun har ek baat guzarti hai jo dil pe

ban jaegi ek roz ye diwan ki surat

TuTa hai abhi tak na hi TuTega kabhi bhi

rakhti hun tujhe sath main ek man ki surat

ab ban ke yaqin dil mein simaT aaya hai mere

aaghaz mein lagta tha jo imkan ki surat

aao to zara bagh mein mil kar unhen dekhen

aae hain parinde yahan mehman ki surat

ai chaaragaro aao mere samne aao

dekho to zara be-sar-o-saman ki surat