ek ajab kaifiyat-e-hosh-ruba tari thi

ik ajab kaifiyat-e-hosh-rubā taarī thī

qarya-e-jāñ meñ kisī jashn kī tayyārī thī

sar jhukā.e hue maqtal meñ khaḌe the jallād

taḳhta-e-dār pe laTkī huī ḳhuddārī thī

ḳhuun hī ḳhuun thā darbār kī dīvāroñ par

qābiz-e-taḳht-e-virāsat kī riyā-kārī thī

ek saa.at jo tirī zulf ke saa.e meñ kaTī

hijr bar-dosh zamānoñ se kahīñ bhārī thī

aur sab Thiik thā bas ham se bhulā.ī na ga.ī

tere ḳhāmosh ravayye meñ jo be-zārī thī

ik qayāmat thī ki rusvā sar-e-bāzār the ham

aur phir us kī vo tashvīsh bhī bāzārī thī

tere mahkūm tire hāshiya-bar-dāroñ kī

sirf vardī hī nahīñ soch bhī sarkārī thī

ek ajab kaifiyat-e-hosh-ruba tari thi

qarya-e-jaan mein kisi jashn ki tayyari thi

sar jhukae hue maqtal mein khaDe the jallad

taKHta-e-dar pe laTki hui KHuddari thi

KHun hi KHun tha darbar ki diwaron par

qabiz-e-taKHt-e-wirasat ki riya-kari thi

ek saat jo teri zulf ke sae mein kaTi

hijr bar-dosh zamanon se kahin bhaari thi

aur sab Thik tha bas hum se bhulai na gai

tere KHamosh rawayye mein jo be-zari thi

ek qayamat thi ki ruswa sar-e-bazar the hum

aur phir us ki wo tashwish bhi bazari thi

tere mahkum tere hashiya-bar-daron ki

sirf wardi hi nahin soch bhi sarkari thi