ek ajab rog mere ji ko laga barson se

ik ajab rog mire jī ko lagā barsoñ se

raas aa.ī bhī nahīñ koī davā barsoñ se

yuuñ to aane ko bahār aa.ī ḳhizāñ bhī aa.ī

dil ke māhaul kī badlī na fazā barsoñ se

mere hī dil kī ye ḳhūbī hai ki is meñ yaaro

rāt-din hotā hai hangāma bapā barsoñ se

minnateñ māñgīñ davā aur duā bhī kar lī

ġhuncha-e-dil kisī sūrat na khilā barsoñ se

kisī nādār kī turbat kā hai tanhā zāmin

ek TuuTā huā ḳhāmosh diyā barsoñ se

kaun hai mere sivā mahram-e-asrār-e-vafā

dil mirā soz-e-mohabbat meñ jalā barsoñ se

merā andāz-e-parastish hai zamāne se judā

maiñ samajhtā huuñ sanam hī ko ḳhudā barsoñ se

ḳhvāb sā ho ke rahā sheva-e-ādāb-o-salām

ab to aatī hī nahīñ lab pe duā barsoñ se

apnī tasvīr ko dekhā to ye mahsūs huā

aisā ik shaḳhs mire saath rahā barsoñ se

fard-e-isyāñ pe mirī dāvar-e-mahshar ne likhā

is se sarzad na huī koī ḳhatā barsoñ se

mauj-e-dariyā kā tarannum kabhī dilkash rim-jhim

kaun hai in meñ sadā naġhma-sarā barsoñ se

kuchh na kuchh is kā bhī mafhūm to hogā 'gauhar'

ġhaib se aatī hai kānoñ meñ sadā barsoñ se

ek ajab rog mere ji ko laga barson se

ras aai bhi nahin koi dawa barson se

yun to aane ko bahaar aai KHizan bhi aai

dil ke mahaul ki badli na faza barson se

mere hi dil ki ye KHubi hai ki is mein yaro

raat-din hota hai hangama bapa barson se

minnaten mangin dawa aur dua bhi kar li

ghuncha-e-dil kisi surat na khila barson se

kisi nadar ki turbat ka hai tanha zamin

ek TuTa hua KHamosh diya barson se

kaun hai mere siwa mahram-e-asrar-e-wafa

dil mera soz-e-mohabbat mein jala barson se

mera andaz-e-parastish hai zamane se juda

main samajhta hun sanam hi ko KHuda barson se

KHwab sa ho ke raha shewa-e-adab-o-salam

ab to aati hi nahin lab pe dua barson se

apni taswir ko dekha to ye mahsus hua

aisa ek shaKHs mere sath raha barson se

fard-e-isyan pe meri dawar-e-mahshar ne likha

is se sarzad na hui koi KHata barson se

mauj-e-dariya ka tarannum kabhi dilkash rim-jhim

kaun hai in mein sada naghma-sara barson se

kuchh na kuchh is ka bhi mafhum to hoga 'gauhar'

ghaib se aati hai kanon mein sada barson se