ek ajab si dhundh mein ab sar basar lipTa hun main

ik 'ajab sī dhuñdh meñ ab sar basar lipTā huuñ maiñ

kho gayā huuñ yuuñ ki ḳhud ko bhī kahāñ dikhtā huuñ maiñ

DhūñDhtā huuñ ik shanāsā majma-e-aġhyār meñ

ajnabī chehre bhī pahroñ dekhtā rahtā huuñ maiñ

shahr kī shab par bapā haiñ jagmagātī lighteñ

haa.e rātoñ ko añdherā DhūñDhtā phirtā huuñ maiñ

ye mirā kār-e-junūñ hai yā majāz-e-justujū

raat bhar saḌkoñ pe yuuñ hī ghūmtā phirtā huuñ maiñ

chashm-e-zāhir kā mujhe pahchānñā mumkin kahāñ

dil kī āñkhoñ se mujhe dekho to jaano kyā huuñ maiñ

raushnī chāroñ taraf hai aur maiñ saaya raqs-kun

ghaT gayā jo is taraf to us taraf baḌhtā huuñ maiñ

fāsla kuchh baḌh gayā merā mirī parchhā.ī se

ye jo terī raushnī se duur sā rahtā huuñ maiñ

sab raqam hī kar diyā to dil meñ baaqī kyā rahe

kuchh ḳhayāl apne hī andar bāñdh kar rakhtā huuñ maiñ

ek 'ajab si dhundh mein ab sar basar lipTa hun main

kho gaya hun yun ki KHud ko bhi kahan dikhta hun main

DhunDhta hun ek shanasa majma-e-aghyar mein

ajnabi chehre bhi pahron dekhta rahta hun main

shahr ki shab par bapa hain jagmagati lighten

hae raaton ko andhera DhunDhta phirta hun main

ye mera kar-e-junun hai ya majaz-e-justuju

raat bhar saDkon pe yun hi ghumta phirta hun main

chashm-e-zahir ka mujhe pahchanna mumkin kahan

dil ki aankhon se mujhe dekho to jaano kya hun main

raushni chaaron taraf hai aur main saya raqs-kun

ghaT gaya jo is taraf to us taraf baDhta hun main

fasla kuchh baDh gaya mera meri parchhai se

ye jo teri raushni se dur sa rahta hun main

sab raqam hi kar diya to dil mein baqi kya rahe

kuchh KHayal apne hi andar bandh kar rakhta hun main