ek bagh to lagao zara shahr-e-zehn mein

ik baaġh to lagāo zarā shahr-e-zehn meñ

kuchh phuul phal ugaao zarā shahr-e-zehn meñ

afkār phir ġhurūb hue samt-e-jahl meñ

raushan karo alaav zarā shahr-e-zehn meñ

bhaTkoge kab talak bhalā sahrā-e-najd meñ

ik roz idhar to aao zarā shahr-e-zehn meñ

ham bhī umīd-vār haiñ ai shahryār-e-dil

ham ko bhī to bulāo zarā shahr-e-zehn meñ

lagtā hai jaise bāb-e-karāmat hī band hai

phir chashm-e-nāz uThāo zarā shahr-e-zehn meñ

ai ahl-e-ḳhānqāh jagāo dimāġh ko

saut-e-azāñ uThāo zarā shahr-e-zehn meñ

aao tumheñ tamāshā dikhā.eñ shu.ūr kā

aa jaao rahnumāo zarā shahr-e-zehn meñ

kab tak butoñ ke pairoñ meñ ḳhud ko girāoge

ab to unheñ girāo zarā shahr-e-zehn meñ

zunnār-band dair-nashīñ sajda-rez huuñ

yuuñ apnī chhab dikhāo zarā shahr-e-zehn meñ

ek bagh to lagao zara shahr-e-zehn mein

kuchh phul phal ugao zara shahr-e-zehn mein

afkar phir ghurub hue samt-e-jahl mein

raushan karo alaw zara shahr-e-zehn mein

bhaTkoge kab talak bhala sahra-e-najd mein

ek roz idhar to aao zara shahr-e-zehn mein

hum bhi umid-war hain ai shahryar-e-dil

hum ko bhi to bulao zara shahr-e-zehn mein

lagta hai jaise bab-e-karamat hi band hai

phir chashm-e-naz uThao zara shahr-e-zehn mein

ai ahl-e-KHanqah jagao dimagh ko

saut-e-azan uThao zara shahr-e-zehn mein

aao tumhein tamasha dikhaen shuur ka

aa jao rahnumao zara shahr-e-zehn mein

kab tak buton ke pairon mein KHud ko giraoge

ab to unhen girao zara shahr-e-zehn mein

zunnar-band dair-nashin sajda-rez hun

yun apni chhab dikhao zara shahr-e-zehn mein