ek bar jo mila tha to khoya nahin gaya

ik baar jo milā thā to khoyā nahīñ gayā

is tarh vo gayā hai ki goyā nahīñ gayā

kal raat terī yaad thī kamre meñ yā ki tū

is darja raushnī thī ki soyā nahīñ gayā

mujh ko ye e'tirāf hai ki nā-tavāñ huuñ maiñ

mujh se mirā vujūd bhī Dhoyā nahīñ gayā

aañsū Thahar ga.e haiñ mire us ke gaal par

shabnam se is gulāb ko dhoyā nahīñ gayā

phir maiñ ne qahqahe kā sahārā liyā hai aaj

dukh is qadar ziyāda thā royā nahīñ gayā

vo lutf-e-'ishq ho ki sitam-hā-e-rozgār

mujh ko kisī laḌī meñ piroyā nahīñ gayā

phir kis samar kī tum ho tamanna liye hue

gar ḳhud ko bhī zamīn meñ boyā nahīñ gayā

ek bar jo mila tha to khoya nahin gaya

is tarh wo gaya hai ki goya nahin gaya

kal raat teri yaad thi kamre mein ya ki tu

is darja raushni thi ki soya nahin gaya

mujh ko ye e'tiraf hai ki na-tawan hun main

mujh se mera wujud bhi Dhoya nahin gaya

aansu Thahar gae hain mere us ke gal par

shabnam se is gulab ko dhoya nahin gaya

phir main ne qahqahe ka sahaara liya hai aaj

dukh is qadar ziyaada tha roya nahin gaya

wo lutf-e-'ishq ho ki sitam-ha-e-rozgar

mujh ko kisi laDi mein piroya nahin gaya

phir kis samar ki tum ho tamanna liye hue

gar KHud ko bhi zamin mein boya nahin gaya