ek be-nam si khoj hai dil ko jis ke asar mein rahte hain

ik be-nām sī khoj hai dil ko jis ke asar meñ rahte haiñ

ham kāġhaz kī naav banā kar roz safar meñ rahte haiñ

hone aur na hone kā ik barzaḳh hai ham jis meñ haiñ

jis meñ shaam ghulī rahtī hai aisī sahar meñ rahte haiñ

apnā to ab is duniyā se kuchh aisā hī naatā hai

jaise niiñd meñ chalne vaale ḳhvāb-nagar meñ rahte haiñ

pastī aur bulandī kyā ab apne ḳhvāb hayūle bhī

gard kī sūrat uḌte haiñ aur rāhguzar meñ rahte haiñ

nīñd-nagar meñ jā kar huur se pahroñ bāteñ hotī haiñ

kaise kaise ḳhvāb mire dīvār-o-dar meñ rahte haiñ

ek havā ke jhoñke hī se laraz ga.e haiñ bām-o-dar

'shabnam' aaise lagtā hai ham ret ke ghar meñ rahte haiñ

ek be-nam si khoj hai dil ko jis ke asar mein rahte hain

hum kaghaz ki naw bana kar roz safar mein rahte hain

hone aur na hone ka ek barzaKH hai hum jis mein hain

jis mein sham ghuli rahti hai aisi sahar mein rahte hain

apna to ab is duniya se kuchh aisa hi nata hai

jaise nind mein chalne wale KHwab-nagar mein rahte hain

pasti aur bulandi kya ab apne KHwab hayule bhi

gard ki surat uDte hain aur rahguzar mein rahte hain

nind-nagar mein ja kar hur se pahron baaten hoti hain

kaise kaise KHwab mere diwar-o-dar mein rahte hain

ek hawa ke jhonke hi se laraz gae hain baam-o-dar

'shabnam' aaise lagta hai hum ret ke ghar mein rahte hain