ek chand sa rahta hai jo chehra mere aage

ik chāñd sā rahtā hai jo chehra mire aage

saaya mire pīchhe hai ujālā mire aage

tārīf ke alfāz na mil paa.eñ luġhat meñ

kāġhaz yūñhī rakkhā hai ye korā mire aage

tasvīr tirī bantī ye mumkin hī nahīñ thā

har ek brush aap hī TuuTā mire aage

puujā hai shab-o-roz tire husn kā paikar

sādhū ka.ī japte rahe maalā mire aage

phūloñ kī ye bārish hai shagun-nek shab-e-vasl

zarbaft kā utrā hai ye joḌā mire aage

har maut pe lagtā hai ye ham ko ki sar-e-ishq

ik dār-o-rasan aur hai taḳhta mire aage

kyā dīda-dilerī rahī hāthoñ meñ mahārat

daulat mirī millat kī safāyā mire aage

hai bahr vahī qāfiya 'ġhālib' kī radīf aur

'safvat' tire ash.ār haiñ kaasa mire aage

ek chand sa rahta hai jo chehra mere aage

saya mere pichhe hai ujala mere aage

tarif ke alfaz na mil paen lughat mein

kaghaz yunhi rakkha hai ye kora mere aage

taswir teri banti ye mumkin hi nahin tha

har ek brush aap hi TuTa mere aage

puja hai shab-o-roz tere husn ka paikar

sadhu kai japte rahe mala mere aage

phulon ki ye barish hai shagun-nek shab-e-wasl

zarbaft ka utra hai ye joDa mere aage

har maut pe lagta hai ye hum ko ki sar-e-ishq

ek dar-o-rasan aur hai taKHta mere aage

kya dida-dileri rahi hathon mein mahaarat

daulat meri millat ki safaya mere aage

hai bahr wahi qafiya 'ghaalib' ki radif aur

'safwat' tere ashaar hain kasa mere aage