ek chashma-e-sarab tha bas aur kuchh na tha

ik chashma-e-sarāb thā bas aur kuchh na thā

saarā safar 'azāb thā bas aur kuchh na thā

thā al-amāñ kā vird zamīñ kī zabān par

neze pe āftāb thā bas aur kuchh na thā

ik pal meñ kyā se kyā huī duniyā nahīñ ḳhabar

har fard mahv-e-ḳhvāb thā bas aur kuchh na thā

tārīkiyoñ ke dasht meñ rahne ke bāvajūd

har zarra āftāb thā bas aur kuchh aur na thā

rangīn kaun kar gayā is kā varaq varaq

maiñ saada ik kitāb thā bas aur kuchh na thā

tūfāñ thā zalzala thā balāoñ kā raqs thā

ye sab tirā ‘itāb thā bas aur kuchh na thā

pahlū meñ rāt-bhar thā koī chāñd sā badan

vo 'shams' ek ḳhvāb thā bas aur kuchh na thā

ek chashma-e-sarab tha bas aur kuchh na tha

sara safar 'azab tha bas aur kuchh na tha

tha al-aman ka wird zamin ki zaban par

neze pe aaftab tha bas aur kuchh na tha

ek pal mein kya se kya hui duniya nahin KHabar

har fard mahw-e-KHwab tha bas aur kuchh na tha

tarikiyon ke dasht mein rahne ke bawajud

har zarra aaftab tha bas aur kuchh aur na tha

rangin kaun kar gaya is ka waraq waraq

main sada ek kitab tha bas aur kuchh na tha

tufan tha zalzala tha balaon ka raqs tha

ye sab tera ‘itab tha bas aur kuchh na tha

pahlu mein raat-bhar tha koi chand sa badan

wo 'shams' ek KHwab tha bas aur kuchh na tha