ek dhuan sa uTh raha tha shahr mein do chaar din

ik dhuāñ sā uTh rahā thā shahr meñ do chaar din

baad is ke ḳhuub barsīñ bārisheñ do chaar din

har taraf nāshād chehre dikh raheñ haiñ āj-kal

muskurā kar ham se koī aa mile do chaar din

vasl meñ do pal sukūñ ke aaj guzreñge to kyā

phir vahī kal se purāne silsile do chaar din

jaane vaalā kah gayā do-chār din meñ aa.egā

kis ki sohbat meñ bitā.eñ ham shab-e-do chaar din

mai-kashī haañ chhoḌ dī hai yaad hañgām-e-qasam

par kisī kī yaad meñ piite rahe do chaar din

ātish-e-ulfat meñ jalne kā alag sā hai maza

jo bhī guzre ḳhuub guzre ishq ke do chaar din

ghar mire aatī nahīñ hai ab falak se raushnī

mere āñgan rahne do jalte diye do chaar din

māñgtā huuñ apne haq ke tum se pal qurbat ke maiñ

sāl-nāma meñ nahīñ hai kyā tire do chaar din

maiñ ne sambhāle rakhā thā bā-hifāzat par mujhe

vaqt par milte nahīñ haiñ vaqt se do chaar din

gum-shuda 'sādiq' kahīñ hai sāl-o-mah mere sabhī

lāpata jāneñ kahāñ haiñ vo mire do chaar din

ek dhuan sa uTh raha tha shahr mein do chaar din

baad is ke KHub barsin barishen do chaar din

har taraf nashad chehre dikh rahen hain aaj-kal

muskura kar hum se koi aa mile do chaar din

wasl mein do pal sukun ke aaj guzrenge to kya

phir wahi kal se purane silsile do chaar din

jaane wala kah gaya do-chaar din mein aaega

kis ki sohbat mein bitaen hum shab-e-do chaar din

mai-kashi han chhoD di hai yaad hangam-e-qasam

par kisi ki yaad mein pite rahe do chaar din

aatish-e-ulfat mein jalne ka alag sa hai maza

jo bhi guzre KHub guzre ishq ke do chaar din

ghar mere aati nahin hai ab falak se raushni

mere aangan rahne do jalte diye do chaar din

mangta hun apne haq ke tum se pal qurbat ke main

sal-nama mein nahin hai kya tere do chaar din

main ne sambhaale rakha tha ba-hifazat par mujhe

waqt par milte nahin hain waqt se do chaar din

gum-shuda 'sadiq' kahin hai sal-o-mah mere sabhi

lapata jaanen kahan hain wo mere do chaar din