ek etimad ajab sa yaqin pe rakhta hun

ik e'timād ajab sā yaqīñ pe rakhtā huuñ

vo kyā hai maiñ jise apnī jabīñ pe rakhtā huuñ

yahī to baat huī jā rahī hai mere ḳhilāf

kahīñ pe miltī hai ik shai kahīñ pe rakhtā huuñ

jo chiiz dekhne kī hai vo baar baar rahe

maiñ is tarah kā tamāsha zamīñ pe rakhtā huuñ

ġhubār hotī huī jā rahī hai ye duniyā

hai haañ kā shā.iba jis ko nahīñ pe rakhtā huuñ

kise ḳhabar hai ye kis vaqt kaam aa jaa.e

hai ḳhaak ḳhaak jise āstīñ pe rakhtā huuñ

havā ho yā ki na ho 'tūr' maiñ charāġh-e-ishq

huuñ chāhtā jahāñ rakhnā vahīñ pe rakhtā huuñ

ek e'timad ajab sa yaqin pe rakhta hun

wo kya hai main jise apni jabin pe rakhta hun

yahi to baat hui ja rahi hai mere KHilaf

kahin pe milti hai ek shai kahin pe rakhta hun

jo chiz dekhne ki hai wo bar bar rahe

main is tarah ka tamasha zamin pe rakhta hun

ghubar hoti hui ja rahi hai ye duniya

hai han ka shaiba jis ko nahin pe rakhta hun

kise KHabar hai ye kis waqt kaam aa jae

hai KHak KHak jise aastin pe rakhta hun

hawa ho ya ki na ho 'tur' main charagh-e-ishq

hun chahta jahan rakhna wahin pe rakhta hun