ek faKHta ye puchh rahi hai hawaon se

ik fāḳhta ye pūchh rahī hai havāoñ se

kab tak chalegā kaam tumhārī du'āoñ se

motī luTā rahe haiñ sitāre adāoñ se

ḳhairāt zau kī laa.e haiñ sūraj ke gaaoñ se

ai intihā-e-shauq zarā sabr kar abhī

uljhā huā hai zehn abhī ibtidāoñ se

ai tīrgī ke saañp mire dil pe loT jā

terā hī zikr-e-ḳhair thā dhuñdlī fazāoñ se

dī haiñ jo āh-e-nīm-shabī ne basīrateñ

kāfūr ho na jaa.eñ sahar kī du'āoñ se

nanhā sā ik farishta khaḌā dekhtā rahā

kuchh kah rahā thā aadmī bargad kī chhāoñ se

shab-bhar bhañbhoḌtā rahā kuttā qayās kā

aisī bhī dil-lagī na kiyā kar gadāoñ se

'hairat' ye e'tiqād kā andhā kuaañ nahīñ

bach kar nikal shu'ūr kī jaltī chitāoñ se

ek faKHta ye puchh rahi hai hawaon se

kab tak chalega kaam tumhaari du'aon se

moti luTa rahe hain sitare adaon se

KHairaat zau ki lae hain suraj ke gaon se

ai intiha-e-shauq zara sabr kar abhi

uljha hua hai zehn abhi ibtidaon se

ai tirgi ke sanp mere dil pe loT ja

tera hi zikr-e-KHair tha dhundli fazaon se

di hain jo aah-e-nim-shabi ne basiraten

kafur ho na jaen sahar ki du'aon se

nanha sa ek farishta khaDa dekhta raha

kuchh kah raha tha aadmi bargad ki chhaon se

shab-bhar bhanbhoDta raha kutta qayas ka

aisi bhi dil-lagi na kiya kar gadaon se

'hairat' ye e'tiqad ka andha kuan nahin

bach kar nikal shu'ur ki jalti chitaon se