ek ghair ki mahfil se uThaya nahin jata

ik ġhair ki mahfil se uThāyā nahīñ jaatā

ik maiñ ki kabhī saath biThāyā nahīñ jaatā

sunñe ko to raazī haiñ vo hāl-e-dil-e-betāb

afsos mujhī se ye sunāyā nahīñ jaatā

is zo.af-o-naqāhat kā burā ho ki shab-e-vasl

vo paas haiñ aur haath lagāyā nahīñ jaatā

tum dekh ke mujh ko to girā dete the parda

muñh sāmne ġhairoñ ke chhupāyā nahīñ jaatā

jis roz se aġhyār ne bhaḌkāyā hai un ko

maiñ bazm meñ us din se bulāyā nahīñ jaatā

ḳhat ġhair kā bhejā hai mujhe yaar ne qāsid

qismat kā likhā sach hai miTāyā nahīñ jaatā

ġham-dost vo huuñ merī tasallī nahīñ hotī

jab tak ki maiñ jī bhar ke satāyā nahīñ jaatā

le le ke mirā naam diyā karte haiñ gaalī

maiñ dil se kabhī un ko bhulāyā nahīñ jaatā

āñkheñ to milāte haiñ ġhazabnāk vo ho kar

afsos hai dil un se milāyā nahīñ jaatā

ab zabt-e-fuġhāñ kā nahīñ yaarā mujhe hargiz

rāz-e-dil-e-betāb chhupāyā nahīñ jaatā

allah re nazākat ki mire qatl pe 'nashtar'

us shoḳh se ḳhanjar bhī uThāyā nahīñ jaatā

ek ghair ki mahfil se uThaya nahin jata

ek main ki kabhi sath biThaya nahin jata

sunne ko to raazi hain wo haal-e-dil-e-betab

afsos mujhi se ye sunaya nahin jata

is zoaf-o-naqahat ka bura ho ki shab-e-wasl

wo pas hain aur hath lagaya nahin jata

tum dekh ke mujh ko to gira dete the parda

munh samne ghairon ke chhupaya nahin jata

jis roz se aghyar ne bhaDkaya hai un ko

main bazm mein us din se bulaya nahin jata

KHat ghair ka bheja hai mujhe yar ne qasid

qismat ka likha sach hai miTaya nahin jata

gham-dost wo hun meri tasalli nahin hoti

jab tak ki main ji bhar ke sataya nahin jata

le le ke mera nam diya karte hain gali

main dil se kabhi un ko bhulaya nahin jata

aankhen to milate hain ghazabnak wo ho kar

afsos hai dil un se milaya nahin jata

ab zabt-e-fughan ka nahin yara mujhe hargiz

raaz-e-dil-e-betab chhupaya nahin jata

allah re nazakat ki mere qatl pe 'nashtar'

us shoKH se KHanjar bhi uThaya nahin jata