ek ghalat kirdar ki pahchan mein mara gaya

ik ġhalat kirdār kī pahchān meñ maarā gayā

maiñ kahānī meñ nahīñ 'unvān meñ maarā gayā

pur-ḳhizāñ mausam meñ bhī shādāb thī rangat mirī

maiñ vo gul huuñ jo tire guldān meñ maarā gayā

ghar ke baTvāre meñ be-shak sab ko daulat mil ga.ī

ḳhuun kā rishta magar dālān meñ maarā gayā

log jiinā chāhte the ye haqīqat hai magar

zindagī ko maut ke imkān meñ maarā gayā

sab se pahle soch phir insāniyat maarī ga.ī

phir bahut kuchh thā jo ik insān meñ maarā gayā

chand ġhazleñ kam-nigāhī ke sitam sahtī rahīñ

aur kuchh ko dafn kar dīvān meñ maarā gayā

phir har ik saa.e ne rūposhī kī chādar oḌh lī

shaam kā sūraj bhī jab maidān meñ maarā gayā

mājrā kyā thā 'nafas' kis kī thī vo āh-o-fuġhāñ

kaun thā kal raat jo zindān meñ maarā gayā

ek ghalat kirdar ki pahchan mein mara gaya

main kahani mein nahin 'unwan mein mara gaya

pur-KHizan mausam mein bhi shadab thi rangat meri

main wo gul hun jo tere guldan mein mara gaya

ghar ke baTware mein be-shak sab ko daulat mil gai

KHun ka rishta magar dalan mein mara gaya

log jina chahte the ye haqiqat hai magar

zindagi ko maut ke imkan mein mara gaya

sab se pahle soch phir insaniyat mari gai

phir bahut kuchh tha jo ek insan mein mara gaya

chand ghazlen kam-nigahi ke sitam sahti rahin

aur kuchh ko dafn kar diwan mein mara gaya

phir har ek sae ne ruposhi ki chadar oDh li

sham ka suraj bhi jab maidan mein mara gaya

majra kya tha 'nafas' kis ki thi wo aah-o-fughan

kaun tha kal raat jo zindan mein mara gaya