ek gosha-e-dil mein jo kisi ke hain makin hum

ik gosha-e-dil meñ jo kisī ke haiñ makīñ ham

ye zo.am hai goyā ki haiñ vālī-e-zamīñ ham

jaarī hai diloñ kā to vahī rabt-e-nihānī

har-chand kahīñ aur haiñ vo aur kahīñ ham

kyā hai ye makāñ kyā ye dayār aur ye jahāñ kyā

ye auj hai apnā ki jahāñ vo haiñ vahīñ ham

ye mo.ajaza-e-ishq hai ik zinda haqīqat

aate haiñ nazar aaj jahāñ bhar meñ hamīñ ham

vaañ apnī rasā.ī na sahī dar to hai us kā

hote nahīñ aġhyār se yuuñ chīñ-ba-jabīñ ham

har ik meñ nazar aatī haiñ kuchh us kī adā.eñ

ulfat na kisī aur se kar baiThe kahīñ ham

jo chāhe kahe iizā de yā kuchh kare tazlīl

dar chhoḌ ke us kā nahīñ jā sakte kahīñ ham

parvāna-e-jannat hameñ dilvāte haiñ kyuuñ aap

kah to diyā sau baar ki jā.eñge nahīñ ham

nazzāra-e-ālam hai bas ik ḳhvāb-e-pareshāñ

bedār hue gar nazar ā.eñge hamīñ ham

duniyā meñ hai nairañgī-e-taqdīr tamāshā

the ābla-pā kal to haiñ ab taḳht-nashīñ ham

uff ik dil-e-'rahbar' pe hasīnoñ kī ye takrār

lalchāeñ hamīñ ham ise pā jaa.eñ hamīñ ham

ek gosha-e-dil mein jo kisi ke hain makin hum

ye zoam hai goya ki hain wali-e-zamin hum

jari hai dilon ka to wahi rabt-e-nihani

har-chand kahin aur hain wo aur kahin hum

kya hai ye makan kya ye dayar aur ye jahan kya

ye auj hai apna ki jahan wo hain wahin hum

ye moajaza-e-ishq hai ek zinda haqiqat

aate hain nazar aaj jahan bhar mein hamin hum

wan apni rasai na sahi dar to hai us ka

hote nahin aghyar se yun chin-ba-jabin hum

har ek mein nazar aati hain kuchh us ki adaen

ulfat na kisi aur se kar baiThe kahin hum

jo chahe kahe iza de ya kuchh kare tazlil

dar chhoD ke us ka nahin ja sakte kahin hum

parwana-e-jannat hamein dilwate hain kyun aap

kah to diya sau bar ki jaenge nahin hum

nazzara-e-alam hai bas ek KHwab-e-pareshan

bedar hue gar nazar aaenge hamin hum

duniya mein hai nairangi-e-taqdir tamasha

the aabla-pa kal to hain ab taKHt-nashin hum

uff ek dil-e-'rahbar' pe hasinon ki ye takrar

lalchaen hamin hum ise pa jaen hamin hum