ek gul-e-tar bhi sharar se nikla

ik gul-e-tar bhī sharar se niklā

bas-ki har kaam hunar se niklā

maiñ tire ba.ad phir ai gum-shudagī

ḳhema-e-gard-e-safar se niklā

ġham nikaltā na kabhī siine se

ik mohabbat kī nazar se niklā

ai saf-e-abr-e-ravāñ tere ba.ad

ik ghanā saaya shajar se niklā

rāste meñ koī dīvār bhī thī

vo isī Dar se na ghar se niklā

zikr phir apnā vahāñ muddat ba.ad

kisī unvān-e-digar se niklā

ham ki the nashsha-e-mahrūmī meñ

ye nayā dard kidhar se niklā

ek Thokar pe safar ḳhatm huā

ek saudā thā ki sar se niklā

ek ik qissa-e-be-ma.anī kā

silsila terī nazar se niklā

lamhe ādāb-e-tasalsul se chhuTe

maiñ ki imkān-e-sahar se niklā

sar-e-manzil hī khulā ai 'bānī'

kaun kis rāhguzar se niklā

ek gul-e-tar bhi sharar se nikla

bas-ki har kaam hunar se nikla

main tere baad phir ai gum-shudagi

KHema-e-gard-e-safar se nikla

gham nikalta na kabhi sine se

ek mohabbat ki nazar se nikla

ai saf-e-abr-e-rawan tere baad

ek ghana saya shajar se nikla

raste mein koi diwar bhi thi

wo isi Dar se na ghar se nikla

zikr phir apna wahan muddat baad

kisi unwan-e-digar se nikla

hum ki the nashsha-e-mahrumi mein

ye naya dard kidhar se nikla

ek Thokar pe safar KHatm hua

ek sauda tha ki sar se nikla

ek ek qissa-e-be-mani ka

silsila teri nazar se nikla

lamhe aadab-e-tasalsul se chhuTe

main ki imkan-e-sahar se nikla

sar-e-manzil hi khula ai 'bani'

kaun kis rahguzar se nikla