ek hath duaon ka asar kaT raha hai

ik haath duāoñ kā asar kaaT rahā hai

hai chhāñv meñ jis kī vo shajar kaaT rahā hai

kaaTā thā kabhī maiñ ne safar ek anokhā

ik umr se ab mujh ko safar kaaT rahā hai

tum Darte ho aa jaa.e na bastī meñ darinda

mujh ko to koī aur hī Dar kaaT rahā hai

phailā hai bahut duur talak mujh meñ bayābāñ

Dastā hai darīcha mujhe dar kaaT rahā hai

is shahr meñ raas aatī nahīñ ā.ina-sāzī

liije vo mirā dast-e-hunar kaaT rahā hai

ho jaa.e kahīñ qad meñ na kal is ke barābar

is ḳhauf se vo bhaa.ī kā sar kaaT rahā hai

har ek se aatī hai bisāñd apnī ġharaz kī

dil kis ke ravayye kā samar kaaT rahā hai

ek hath duaon ka asar kaT raha hai

hai chhanw mein jis ki wo shajar kaT raha hai

kaTa tha kabhi main ne safar ek anokha

ek umr se ab mujh ko safar kaT raha hai

tum Darte ho aa jae na basti mein darinda

mujh ko to koi aur hi Dar kaT raha hai

phaila hai bahut dur talak mujh mein bayaban

Dasta hai daricha mujhe dar kaT raha hai

is shahr mein ras aati nahin aaina-sazi

lije wo mera dast-e-hunar kaT raha hai

ho jae kahin qad mein na kal is ke barabar

is KHauf se wo bhai ka sar kaT raha hai

har ek se aati hai bisand apni gharaz ki

dil kis ke rawayye ka samar kaT raha hai