ek haqiqat ke zawiye hain kai

ik haqīqat ke zāviye haiñ ka.ī

'aks-dar-'aks aa.ine haiñ ka.ī

aañkh dāman suḳhan adā andāz

mus.haf-e-dil ke hāshiye haiñ ka.ī

dasht-e-nau yuuñ na dil ko chhoTā kar

paañv meñ ab bhī aable haiñ ka.ī

chāñd ubhrā hai phir se āñkhoñ meñ

phir sitāre chamak uThe haiñ ka.ī

hijr bhī ek mas.ala thā magar

paas ho tum to mas.ale haiñ ka.ī

yuuñ bhī hotā hai koī būm-sifat

shahr vīrān ho chale haiñ ka.ī

aa ke manzil pe ye huā ehsās

mujh se apne bichhaḌ chuke haiñ ka.ī

harf kāġhaz qalam haiñ nā-kāfī

tajrabe kaal ban ga.e haiñ ka.ī

merī āñkhoñ ne raaz faash kiye

varna 'vāhid-nazīr' se haiñ ka.ī

ek haqiqat ke zawiye hain kai

'aks-dar-'aks aaine hain kai

aankh daman suKHan ada andaz

mushaf-e-dil ke hashiye hain kai

dasht-e-nau yun na dil ko chhoTa kar

panw mein ab bhi aable hain kai

chand ubhra hai phir se aankhon mein

phir sitare chamak uThe hain kai

hijr bhi ek masala tha magar

pas ho tum to masale hain kai

yun bhi hota hai koi bum-sifat

shahr viran ho chale hain kai

aa ke manzil pe ye hua ehsas

mujh se apne bichhaD chuke hain kai

harf kaghaz qalam hain na-kafi

tajrabe kal ban gae hain kai

meri aankhon ne raaz fash kiye

warna 'wahid-nazir' se hain kai