ek hasin ko dil de kar kya bataen kya paya

ik hasīñ ko dil de kar kyā batā.eñ kyā paayā

lazzat-e-fanā chakkhī ziist kā mazā paayā

manziloñ kī saḳhtī kā ġham nahīñ ḳhushī ye hai

kis hujūm-e-hasrat meñ ham ne rāsta paayā

qadr us kī pahchāneñ aap yā na pahchāneñ

apne dil ko ham ne to hasb-e-mudda.ā paayā

be-ḳhudī kī hasrat kyā be-sabab maiñ kartā thā

aa ke hosh meñ samjhā be-ḳhudī meñ kyā paayā

shaiḳh ye tahī sāġhar haañ isī ko saaqī ne

mere kaam kā paayā yā tere kaam kā paayā

hasrateñ sarāsīma har taraf nazar aa.iiñ

kārvān-e-dil maiñ ne phir luTā huā paayā

merī mastiyāñ samjheñ terī shoḳhiyāñ jāneñ

tū ne kyā liyā mujh se maiñ ne tujh se kyā paayā

sab ye rañg-āmezī hai faqat taḳhayyul kī

kyā batā.ūñ kyā khoyā kyā jatā.ūñ kyā paayā

paas baiTh kar mere dekhte nahīñ mujh ko

un kī sharm ko maiñ ne sabr-āzmā paayā

sa.i-e-paiham ai 'manzūr' is qadr nashāt-afzā

nā-umīd kis se the kis se ye sila paayā

ek hasin ko dil de kar kya bataen kya paya

lazzat-e-fana chakkhi zist ka maza paya

manzilon ki saKHti ka gham nahin KHushi ye hai

kis hujum-e-hasrat mein hum ne rasta paya

qadr us ki pahchanen aap ya na pahchanen

apne dil ko hum ne to hasb-e-muddaa paya

be-KHudi ki hasrat kya be-sabab main karta tha

aa ke hosh mein samjha be-KHudi mein kya paya

shaiKH ye tahi saghar han isi ko saqi ne

mere kaam ka paya ya tere kaam ka paya

hasraten sarasima har taraf nazar aain

karwan-e-dil main ne phir luTa hua paya

meri mastiyan samjhen teri shoKHiyan jaanen

tu ne kya liya mujh se main ne tujh se kya paya

sab ye rang-amezi hai faqat taKHayyul ki

kya bataun kya khoya kya jataun kya paya

pas baiTh kar mere dekhte nahin mujh ko

un ki sharm ko main ne sabr-azma paya

sai-e-paiham ai 'manzur' is qadr nashat-afza

na-umid kis se the kis se ye sila paya