ek husn-e-be-misal ke jo ru-ba-ru hun main

ik husn-e-be-misāl ke jo rū-ba-rū huuñ maiñ

mahsūs ho rahā hai ḳhud apnā 'adū huuñ maiñ

apnī giraft-e-shauq se niklūñ to kis tarah

phailā huā jahāñ meñ har ek sū huuñ maiñ

mujh pe tirī hayāt kā dār-o-madār hai

jazboñ se jhāñktā huā zinda lahū huuñ maiñ

gūñjūñgā tere zehn ke gumbad meñ rāt-din

jis ko na to bhulā sake vo guftugū huuñ maiñ

har sub.h ek mā'rka-e-karbalā sahī

har shaam apne dostoñ meñ surḳh-rū huuñ maiñ

pūchhūñ maiñ kis se 'ālam-e-imkāñ meñ kis liye

apne hī naqsh-e-pā kī tarah kū-ba-kū huuñ maiñ

'saifī' meñ apne aap meñ nīlām ho gayā

kis ko ḳhabar thī shahr meñ ik ḳhūb-rū huuñ maiñ

ek husn-e-be-misal ke jo ru-ba-ru hun main

mahsus ho raha hai KHud apna 'adu hun main

apni giraft-e-shauq se niklun to kis tarah

phaila hua jahan mein har ek su hun main

mujh pe teri hayat ka dar-o-madar hai

jazbon se jhankta hua zinda lahu hun main

gunjunga tere zehn ke gumbad mein raat-din

jis ko na to bhula sake wo guftugu hun main

har subh ek ma'rka-e-karbala sahi

har sham apne doston mein surKH-ru hun main

puchhun main kis se 'alam-e-imkan mein kis liye

apne hi naqsh-e-pa ki tarah ku-ba-ku hun main

'saifi' mein apne aap mein nilam ho gaya

kis ko KHabar thi shahr mein ek KHub-ru hun main