ek intizar sa tha ab nazar mein wo bhi nahin

ik intizār sā thā ab nazar meñ vo bhī nahīñ

safar meñ marne kī fursat thī ghar meñ vo bhī nahīñ

zarā malāl kī zulmat ko Tālne ke liye

ka.ī ḳhayāl the ab to asar meñ vo bhī nahīñ

jo sang-o-ḳhār the merī hī gardishoñ tak the

maiñ rahguzar meñ nahīñ rahguzar meñ vo bhī nahīñ

the chashm-e-bām-nagar meñ ajab tulūa ke rang

vo ik nashāt-e-sahar thā sahar meñ vo bhī nahīñ

kahāñ kī lazzat-e-bālīdgī-e-shāḳh-o-samar

jo zā.iqa thā havā-e-shajar meñ vo bhī nahīñ

rahe na kuchh bhī magar ab ye kaif kyā kam hai

jis āgahī kī kamī thī hunar meñ vo bhī nahīñ

ek intizar sa tha ab nazar mein wo bhi nahin

safar mein marne ki fursat thi ghar mein wo bhi nahin

zara malal ki zulmat ko Talne ke liye

kai KHayal the ab to asar mein wo bhi nahin

jo sang-o-KHar the meri hi gardishon tak the

main rahguzar mein nahin rahguzar mein wo bhi nahin

the chashm-e-baam-nagar mein ajab tulua ke rang

wo ek nashat-e-sahar tha sahar mein wo bhi nahin

kahan ki lazzat-e-baalidgi-e-shaKH-o-samar

jo zaiqa tha hawa-e-shajar mein wo bhi nahin

rahe na kuchh bhi magar ab ye kaif kya kam hai

jis aagahi ki kami thi hunar mein wo bhi nahin