ek ishq karo zaKHm-e-jigar aate hain kitne

ik ishq karo zaḳhm-e-jigar aate haiñ kitne

ik peḌ lagāo to samar aate haiñ kitne

dil jiit hī legā vo mirī kuchh na chalegī

shātir hai balā kā use ghar aate haiñ kitne

kyā haal hai ab dard-e-judā.ī kā batāo

ik ik ke akele meñ nazar aate haiñ kitne

kahnā tumheñ aate haiñ fasāne bhī ġhazal bhī

duniyā meñ panapne ke hunar aate haiñ kitne

muñh se vo kisī baat kī dāvat nahīñ detā

paiġhām ba-andāz-e-digar aate haiñ kitne

lākhoñ haiñ shajar yuuñ to magar dekhnā hogā

darpesh safar ho to shajar aate haiñ kitne

ash.ār-e-ġhazal 'mīr' ke lahje meñ na likkho

sunñe ko tumheñ ḳhasta-jigar aate haiñ kitne

har shaḳhs kī qismat meñ to manzil nahīñ hotī

hamrāh liye zād-e-safar aate haiñ kitne

rahzan safar-e-umr meñ ik aatā hai lekin

is chhoTī sī fursat meñ ḳhizar aate haiñ kitne

har baar 'shahāb' un se mulāqāt se pahle

asbāb bichhaḌne ke nazar aate haiñ kitne

ek ishq karo zaKHm-e-jigar aate hain kitne

ek peD lagao to samar aate hain kitne

dil jit hi lega wo meri kuchh na chalegi

shatir hai bala ka use ghar aate hain kitne

kya haal hai ab dard-e-judai ka batao

ek ek ke akele mein nazar aate hain kitne

kahna tumhein aate hain fasane bhi ghazal bhi

duniya mein panapne ke hunar aate hain kitne

munh se wo kisi baat ki dawat nahin deta

paigham ba-andaz-e-digar aate hain kitne

lakhon hain shajar yun to magar dekhna hoga

darpesh safar ho to shajar aate hain kitne

ashaar-e-ghazal 'mir' ke lahje mein na likkho

sunne ko tumhein KHasta-jigar aate hain kitne

har shaKHs ki qismat mein to manzil nahin hoti

hamrah liye zad-e-safar aate hain kitne

rahzan safar-e-umr mein ek aata hai lekin

is chhoTi si fursat mein KHizar aate hain kitne

har bar 'shahab' un se mulaqat se pahle

asbab bichhaDne ke nazar aate hain kitne