ek iztirab sa sine mein har ghaDi hai mujhe

ik iztirāb sā siine meñ har ghaḌī hai mujhe

Thahr ai zindagī ik baat pūchhnī hai mujhe

idhar se jab bhī guzarnā ho to pukārā kar

añdhere meñ tirī āvāz raushnī hai mujhe

ajiib tarah kī tanhā.ī hai mire ghar meñ

har ek chiiz udāsī se dekhtī hai mujhe

maiñ ab to kashtī-e-jāñ meñ savār ho chukā huuñ

so dekhiye kahāñ le jā ke chhoḌtī hai mujhe

mujhe batā jo kabhī lauTtā ho guzrā vaqt

ki phir se tujh meñ vahī baat dekhnī hai mujhe

maiñ us se tark-e-ta.alluq to kar bhī luuñ lekin

na jaane kaun sī ummīd roktī hai mujhe

maiñ apne TūTte ghar kī huuñ āḳhirī ummīd

so ishq bhar nahīñ har baat sochnī hai mujhe

ek iztirab sa sine mein har ghaDi hai mujhe

Thahr ai zindagi ek baat puchhni hai mujhe

idhar se jab bhi guzarna ho to pukara kar

andhere mein teri aawaz raushni hai mujhe

ajib tarah ki tanhai hai mere ghar mein

har ek chiz udasi se dekhti hai mujhe

main ab to kashti-e-jaan mein sawar ho chuka hun

so dekhiye kahan le ja ke chhoDti hai mujhe

mujhe bata jo kabhi lauTta ho guzra waqt

ki phir se tujh mein wahi baat dekhni hai mujhe

main us se tark-e-talluq to kar bhi lun lekin

na jaane kaun si ummid rokti hai mujhe

main apne TuTte ghar ki hun aaKHiri ummid

so ishq bhar nahin har baat sochni hai mujhe