ek jang ke andaz mein guftar khaDi thi

ik jang ke andāz meñ guftār khaḌī thī

bad-rang anā miTne ko tayyār khaḌī thī

kyoñ 'ishq ke hī shahr pe TuuTā thā faqat qahr

jab husn kī bastī bhī gunahgār khaḌī thī

ik ḳhvāb bhī sharminda-e-tā’bīr nahīñ thā

ik niiñd shabistān meñ bedār khaḌī thī

aahaT huī gūñgī yā samā'at huī bahrī

darvāze pe yā phir koī dīvār khaḌī thī

qadmoñ kī jasārat rahī manzil kī taraf-dār

par rāhoñ se lipTī huī raftār khaḌī thī

ehsās ke par kaaT ke dil kar ke shikasta

hoñToñ se lagī tanz kī talvār khaḌī thī

kyoñ husn ke bāzār meñ chaltā mirā sikka

jab chashm-e-‘adū dil kī ḳharīdār khaḌī thī

ik aañch thī har naqsh-e-ruḳh-e-yār meñ pinhāñ

vo husn thā yā ātishī yalġhār khaḌī thī

rotā rahā 'aḳhtar' maiñ gunāhoñ se lipaT kar

aur merī ḳhirad ik taraf bīmār khaḌī thī

ek jang ke andaz mein guftar khaDi thi

bad-rang ana miTne ko tayyar khaDi thi

kyon 'ishq ke hi shahr pe TuTa tha faqat qahr

jab husn ki basti bhi gunahgar khaDi thi

ek KHwab bhi sharminda-e-ta’bir nahin tha

ek nind shabistan mein bedar khaDi thi

aahaT hui gungi ya sama'at hui bahri

darwaze pe ya phir koi diwar khaDi thi

qadmon ki jasarat rahi manzil ki taraf-dar

par rahon se lipTi hui raftar khaDi thi

ehsas ke par kaT ke dil kar ke shikasta

honTon se lagi tanz ki talwar khaDi thi

kyon husn ke bazar mein chalta mera sikka

jab chashm-e-‘adu dil ki KHaridar khaDi thi

ek aanch thi har naqsh-e-ruKH-e-yar mein pinhan

wo husn tha ya aatishi yalghaar khaDi thi

rota raha 'aKHtar' main gunahon se lipaT kar

aur meri KHirad ek taraf bimar khaDi thi