ek jawani ka sabab aur pur-arman hona

ik javānī kā sabab aur pur-armāñ honā

saḳht mushkil hai mirī maut kā āsāñ honā

maiñ kahāñ nazm kahāñ jāhil-e-mutlaq huuñ maiñ

us kī qudrat hai mirā sāhib-e-dīvāñ honā

kārgar pand-o-nasīhat nahīñ hotī us ko

jis kī taqdīr meñ likkhā ho pareshāñ honā

vaqt-e-zīnat hai mujhe un pe hañsī aatī hai

aa.ina dekhnā aur aap hī hairāñ honā

yaad aatī haiñ mujhe un kī vo bholī bāteñ

ḳhud mujhī ko sunā aur ḳhud hī pashemāñ honā

tū ne sayyād qafas par jo rakhe phuul to kyā

maut bulbul kī hai dūrī-e-gulistāñ honā

gar isī tarah haiñ ġhārat-gar-e-duniyā tire zulm

merī nazroñ meñ hai aalam kā bayābāñ honā

har rag-e-dil meñ mirī roz ḳhalish hotī hai

is meñ mumkin hai tire tiir kā paikāñ honā

ek din aane kā ik sū-e-adam jaane kā

rasm hai ḳhalq meñ do roz kā mehmāñ honā

dil ye kahtā hai mirā silsila gesū se rahā

maiñ ne sīkhā hai pareshāñ se pareshāñ honā

raushnī qabr pe kar de koī itnā bhī nahīñ

qahr hai dil kā charāġh-e-tah-e-dāmāñ honā

ai junūñ terī hī ḳhaslat hai mirī rag rag meñ

ab kabhī mujh se na tū dast-o-garebāñ honā

laash bhī terī galī se na nikalne degā

hijr meñ dam kā mire sūrat-e-armāñ honā

dil-e-betāb mirā siine se bāhar aaya

ab to mumkin hī nahīñ raaz kā pinhāñ honā

bolā jallād ki ham bātoñ meñ karte haiñ qatl

ham ko sharmātā hai shamshīr kā uryāñ honā

be-kasī kahtī hai vīrāna rahe is jā par

jis se zāhir ho kabhī gor-e-ġharībāñ honā

mere ahbāb ye kahte haiñ ki jāhil hai 'shafīq'

hai bahut jā-e-ajab is kā ġhazal ḳhvāñ honā

ek jawani ka sabab aur pur-arman hona

saKHt mushkil hai meri maut ka aasan hona

main kahan nazm kahan jahil-e-mutlaq hun main

us ki qudrat hai mera sahib-e-diwan hona

kargar pand-o-nasihat nahin hoti us ko

jis ki taqdir mein likkha ho pareshan hona

waqt-e-zinat hai mujhe un pe hansi aati hai

aaina dekhna aur aap hi hairan hona

yaad aati hain mujhe un ki wo bholi baaten

KHud mujhi ko suna aur KHud hi pasheman hona

tu ne sayyaad qafas par jo rakhe phul to kya

maut bulbul ki hai duri-e-gulistan hona

gar isi tarah hain ghaarat-gar-e-duniya tere zulm

meri nazron mein hai aalam ka bayaban hona

har rag-e-dil mein meri roz KHalish hoti hai

is mein mumkin hai tere tir ka paikan hona

ek din aane ka ek su-e-adam jaane ka

rasm hai KHalq mein do roz ka mehman hona

dil ye kahta hai mera silsila gesu se raha

main ne sikha hai pareshan se pareshan hona

raushni qabr pe kar de koi itna bhi nahin

qahr hai dil ka charagh-e-tah-e-daman hona

ai junun teri hi KHaslat hai meri rag rag mein

ab kabhi mujh se na tu dast-o-gareban hona

lash bhi teri gali se na nikalne dega

hijr mein dam ka mere surat-e-arman hona

dil-e-betab mera sine se bahar aaya

ab to mumkin hi nahin raaz ka pinhan hona

bola jallad ki hum baaton mein karte hain qatl

hum ko sharmata hai shamshir ka uryan hona

be-kasi kahti hai virana rahe is ja par

jis se zahir ho kabhi gor-e-ghariban hona

mere ahbab ye kahte hain ki jahil hai 'shafiq'

hai bahut ja-e-ajab is ka ghazal KHwan hona