ek KHata barha nahin karte

ik ḳhatā bārhā nahīñ karte

ab kisī se vafā nahīñ karte

ham se ummīd kyā vo rakhte haiñ

ham koī mo.ajiza nahīñ karte

ishq karte haiñ aaj bhī lekin

vasl kī ab duā nahīñ karte

kyoñ vo ham ko sañvār detā hai

ham ujaḌne ko kyā nahīñ karte

ham bhī shikve chhupā ke rakhte haiñ

vo bhī ham se gila nahīñ karte

yaad rakhnā tum is zamāne meñ

yaar ham se milā nahīñ karte

tum bhī 'afrang' zaḳhm de lo hameñ

ham kisī ko ḳhafā nahīñ karte

ek KHata barha nahin karte

ab kisi se wafa nahin karte

hum se ummid kya wo rakhte hain

hum koi moajiza nahin karte

ishq karte hain aaj bhi lekin

wasl ki ab dua nahin karte

kyon wo hum ko sanwar deta hai

hum ujaDne ko kya nahin karte

hum bhi shikwe chhupa ke rakhte hain

wo bhi hum se gila nahin karte

yaad rakhna tum is zamane mein

yar hum se mila nahin karte

tum bhi 'afrang' zaKHm de lo hamein

hum kisi ko KHafa nahin karte