ek KHayal-afroz mauj aai to thi

ik ḳhayāl-afroz mauj aa.ī to thī

maiñ ne apnī satr mahkā.ī to thī

tum nahīñ the yaad thī har sū muhīt

maiñ nahīñ thī merī tanhā.ī to thī

dar-ba-dar be-pairahan thā ḳhvāb-e-ishq

maiñ ne us ko aañkh pahnā.ī to thī

phir mujhe us ne kahā sab jhuuT hai

ek lamhe ko maiñ ghabrā.ī to thī

duur tak bichhtā chalā jaatā thā shauq

kuchh nahīñ thā dasht-paimā.ī to thī

kyuuñ mujhe dariyā bulātā hai qarīb

us kī āñkhoñ meñ bhī gahrā.ī to thī

kyuuñ zamīn-o-āsmāñ haiñ raqs meñ

aur kyā thā ek añgḌā.ī to thī

lamha bhar ko hī Dhalā thā āftāb

lamha bhar ko raah dhundlā.ī to thī

maiñ ki haq par DaT ga.ī thī 'rāshida'

us kī bātoñ meñ bhī sachchā.ī to thī

ek KHayal-afroz mauj aai to thi

main ne apni satr mahkai to thi

tum nahin the yaad thi har su muhit

main nahin thi meri tanhai to thi

dar-ba-dar be-pairahan tha KHwab-e-ishq

main ne us ko aankh pahnai to thi

phir mujhe us ne kaha sab jhuT hai

ek lamhe ko main ghabrai to thi

dur tak bichhta chala jata tha shauq

kuchh nahin tha dasht-paimai to thi

kyun mujhe dariya bulata hai qarib

us ki aankhon mein bhi gahrai to thi

kyun zamin-o-asman hain raqs mein

aur kya tha ek angDai to thi

lamha bhar ko hi Dhala tha aaftab

lamha bhar ko rah dhundlai to thi

main ki haq par DaT gai thi 'rashida'

us ki baaton mein bhi sachchai to thi